HUMAN sa dul-an sa duha ka buwan gikan sa pagbanhig-patay kang manlalaban Noel Archival ug mga kauban, hingpit na nga napasaka ngadto sa Provincial Prosecutor’s Office ang mga reklamo batok sa mga gipasanginlang utok ug nipasiugda sa krimen.
Ang hiniusang pwersa sa National Bureau of Investigation 7 ug Special Investigation Task Group Archival niduso og reklamong multiple murder ug frustrated murder batok sa mga gikatahapan.
Gipasakaan sa mga reklamo ang mga opisyal sa Highway Patrol Group 7 nga sila si Sr. Supt. Romualdo Iglesia, Sr. Inspector Joselito Lerion, Chief Inspector Eduardo Mara ug SPO4 Edwin Galan.
Gawas nila, dunay laing HPG personnel nga ginganlan og PO1 Alex Bacani ug pipila pa ka wa mailhing mga mamumuno.
Atol sa pagpamanhig niadtong Pebrero 18, namatay diha-diha si Archival ingon man ang iyang driver nga si Alejandro Jaime ug security aide nga si Candido Miñoza. Samdan apan luwas ang laing aide nga si Paolo Cortez.
Ang usa sa mga imbestigador sa NBI, manlalaban Ermie Monsanto, nitug-an nga nigawas sa ilang imbestigasyon nga ang 15 ka mga kasong gihuptan ni Archival nga naglambigit sa HPG maoy hinungdan nga nahimo sa mga gikatahapan ang pagpatay kaniya.
Gihulagway ni Monsanto nga lig-on ang ilang nakuhang mga ebidensiya batok sa mga sinumbong.
Karong adlawa, moduso usab og laing criminal ug administrative charges ang NBI ug task group Archival ngadto sa Ombudsman batok sa mga opisyal ug personnel sa HPG nga nalambigit sa krimen. (AZDL)