Hubog nalumos; laing gipusil sa iyang silingan

NALUMOS ang usa ka hubog nga kalit lang mi-dive sa dagat didto sa Barangay Poblacion, lungsod sa Dalaguete sa niaging adlaw.

Ang 48 anyos nga si Rico Gerat nakit-an na lang sa iyang higalang gikainum nga nautaw-utaw sa kadagatan mga alas 6 sa sayong gabii.

Ang imbestigasyon sa kapulisan nagbutyag nga si Gerat uban ni Rodrigo Bulao, 47, nag-inum daplin sa dagat ug sa dihang nahubog na kini kalit kining miambak.

Mga tres minutos ang nakalabay, misunod usab pag-ambak si Bulao apan sa pagtugpa niya sa dagat mao na lay misugat sa iyang mga mata nga naglutaw nga wa sa iyang panimuot si Gerat.

Gisuwayan unta sa pagluwas ni Bulao si Gerat ug gidala gilayon kini sa baybayon.

Nabantayan ni Bulao nga sigi og buwa-buwa ang baba ni Gerat hinungdan iya kining gidala sa Julio Cardinal Rosales Memorial Hospital apan gideklarar kining dead-on-arrival.

Lima ka oras ang milabay, 21- anyos nga way trabaho ang gipusil sa iya ra pud nga silingan didto sa Barangay Tigbao, lungsod sa Badian.

Si Efren Omagac, nakaangkon og samad pinusilan sa iyang agtang ug anaa karon sa kritikal nga kahimtang.

Gitumbok nga suspek sa pagpusil ang usa ka Camilo Bejec, 47, ginamit ang “sumpak” o improvised nga shotgun.

Matod pa sa kapulisan nga human nakig-inom ang biktima sa iyang mga amigo ug kaliwat, mitindog kini ug nagbarog sa pultahan sa iyang balay.

Pipila ka gutlo ang mialabay, ang suspek kalit lang nga miatake kaniya ug mipusil.

Hinuon si Bejec nasikop sa kapulisan atol sa gihimong hot pursuit operation samtang si Omagac gidala sa iyang mga ginikanan sa Badian District Hospital ug gibalhin na karon sa tambalanan sa dakbayan sa Sugbo. Gikan ni KAL sa Sun.Star Cebu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph