TUNGOD sa padayon nga pagpunsisok sa mga pasahero sa nagkadaiyang bus terminal ning siyudad sa Cagayan de Oro gipatuman karon ang hugot nga seguridad.
Ang kapulisan sa Cagayan de Oro City Police Office (Cocpo) ang mipahigayon og inspeksyon sa mga pasahero ug labina gyod sa ilang mga dala.
Gibutyag ni Senior Inspector Ivan Viñas kinsa hepe sa Police Station 3 (PS3) sa Agora nga niaging semana pa silang 24 oras nga nakabantay sa mga bus terminal labina gyod sulod mismo sa mga bus.
Adunay mga pilis nga nagsul-ob og uniporme ug wala naka uniporme ang moinspeksyon sa mga gamit sa pasahero.
Nanawagan si Viñas nga unta magdala lamang ang mga pasahero ug handy nga mga dal-onon aron dili malangan tungod kay ila kining tagsa-tagsaon og susi.
Gipahibalo usab niini nga ang mga pasahero kung adunay mga problema o nagkinahanglan sa ilang tabang adunay passengers booth sulod sa terminal ug mahimong doulan gawas pa nga doul lamang usab ang terminal sa ilang istasyon.
Gawas niini ang Land Tranportation Office milusad usab og sorpresang inspeksyon ngadto sa mga bus ug usa niini nga mao ang DC Express ang gipugngan nga dili ipabiyahe tungod kay adunay problema sa ligid niini ug nakitang nagpunsisok pa ang pasahero. (SVB)