Ice pop vendor gihangyo buhian

ANG 10th Infantry Division sa Philippine Army nanawagan karon nga buhian sa mga tawo nga midagit sa usa ka ice pop vendor didto sa Barangay Mapula, distrito sa Paquibato, siyudad sa Davao niadtong Septyembre 7, 2010.

"Dapat pakawalan na nila ang victim kasi wala siyang kasalanan," ni 10th ID spokesperson Lt. Col. Medel Aguilar sa Superbalita bahin sa pagkadagit ni Jerry Gomez, 38, ug nagpuyo sa New Malitbog, Panabo City.

Si Gomez giingon nga namaligya og ice pop atol sa araw ng barangay sa Mapula apan wa na siya mahiuli sa ilang balay mao nga nagpakitabang karon ang iyang kabanay.

Sanglit gidagit ang biktima didto sa Mapula nga maoy teretoryo sa mga rebeldeng New People's Army (NPA), miguwa ang katahap nga gidagit siya sa mga NPA.

Sa pasiunang imbestigasyon sa mga otoridad, gidagit ang biktima sa mga rebelde gumikan sa pagtuo nga siya impormante sa militar nga nagtakuban lamang nga mamaligyaay og ice pop sa maong dapit.

Ang pasangil nga gidagit siya sa mga NPA, sa pagsuwat ning balita, wa pay tubag ang mga giakusahan bahin sa maong insidente.

Human nadagit si Gomez, nanawagan si Aguilar ngadto sa mga militanteng pundok nga kondenahon ang mga NPA tungod sa paglapas sa katungod sa mga inosenteng sibilyan.

Ang Bagong Alyansang Makabayan (Bayan) daling mitubag nga andam silang motabang sa pamilya ni Gomez kung ugaling moduol kanila, sigun ni Bayan spokesperson John Birondo.

"Bahin sa panawagan sa militar nga kondenahon namo ang mga NPA, dili kana mahimo tungod kay wala man ta mahibalo kung kinsa ang midagit sa biktima. Gihimo kini sa militar aron tabunan ang ilang kabangis nga gihimo sa mga sibilyan sa bukid," pung ni Birondo.

Ang militar misaad nga ilang himuon ang rescue operation sa bukid aron luwason ang biktima nga gituohan nga tua sa kamot sa mga NPA. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph