IGSUON ni Joel “Tongol” Nodalo ang gipangita karon sa kapulisan human namusil sa iyang gikainom niadtong Sabado sa gabii sa sityo Bato, barangay Ermita, siyudad sa Sugbo.
Nalandig sa Cebu City Medical Center (CCMC) si Ronalo Calma, 24, usa ka sidewalk vendor, nga nagpuyo sa Quezon blvd., sa nahisgutang barangay, human gipusil ni Botex Nodalo, igsuon sa namatay nga si Joel Nodalo, ang giila sa kapulisan nga bigtime drug pusher ug suspek sa mga dagkong tulis sa siyudad.
Sumala sa Homicide Section sa Cebu City Police Office (CCPO) nga ang biktima ug ang suspek nga managsilingan sa maong dapit nag-inom uban sa lain pa nilang mga higala.
Sa way igong hinungdan, gipusil dayon sa suspek ang biktima sa makadaghang higayon ug kini naigo sa tuong bahin sa iyang ulo ug bukobuko.
Daling nisibat ang suspek samtang ang biktima gidala sa CCMC diin kini giobserbahan sa mga doktor.
SI SPO3 Rey Cuyos nagkanayon nga dihang ilang gipangutana ang biktima kon naglalis ba sila sa suspek saw a pa ang pagpamusil, nihimakak kini.
Giingong wa masayod ang biktima kon unsay motibo sa suspek sa pagpamusil.
“Pero kahibawo na ta anang lugara diha, di lang sila motug-an sa tinuod,” nagkanayon si Cuyos, kinsa nagduda nga posibling may kalambigitan sa illegal nga drugas ang pagpamusil.
Gisuwayan pa sa kapulisan og gukod si Nodalo apan wa na kini makit-i. (CPL)