`Ilaga’ gipatay sa 2 ka tawo nga nagtaptap

GIPATAY ang giilang idlas nga drug pusher sa lungsod sa Argao, Sugbo nga gitawag og “Ilaga” sa gidudahang mga gun-for-hire niadtong Huwebes sa gabii samtang nagtan-aw og telebisyon sa Kintanar st., Brgy. Poblacion sa nahisgutang lungsod.

Laing tulo ka mga tawo nangapagan.

Si Elmer Dela Pena Amarillo, 40, nagpuyo sa nahisgutang lugar, nakaangkog mga samad pinusilan sa iyang nawong, dughan, tiyan, ug lubot.

Ang mga killer nga daling nakasibat nag-bonnet ug nagmotorsiklo.

Si SPO3 Esteban Albuera, officer-in-Charge (OIC) nga nahinabi sa Sun.Star Superbalita, nagkanayon nga ang biktima naglingkod sa lingkuranan nga kawayan sulod sa usa ka bilyaran, diin sa likod niini dunay mga silingan nga nagduwag hantak.

Kalit lang nabati sa mga saksi ang sunodsunod nga mga buto sa armas gikan sa likod sa biktima hinungdan nga nagkatibuwaag ang mga tawo sa pagpanagan samtang ang biktima nahagba.

Matod ni Albuera nga human mahagba ang biktima, usa sa mga killer nisulod sa kyosko agi sa luyo nga pultahan ug gidul-itan sa pusil ug gitiwasan.

Ang duha ka mga killer, base sa gisulti sa mga saksi, nga nagsul-ob kinig bonnet nga kolor itom, usa taason ug dakuon, samtang ang kauban ordinaryo lang ang gidak-on apan wa gyuy nakamay-ong kay dali kaayong nisibat sakay sa motorsiklo nga kolor puti.

Gibutyag ni Albuera nga sa wa pa ang krimin, mga alas 8-9 sa gabii niadtong Miyerkulis, dunay mga saksi nga nakakita nga dunay duha ka mga motorsiklo nga nakit-an nga nagbahis-bahis sa lugar.

Usa sa duha ka mga motorsiklo maoy gisakyan atol sa krimin.

Sumala pa niya nga ang mga killer agrisibo kaayong nihimo sa krimin nga daw way kulba sanglit mga 100-150 metros lang ang gilay-on sa police station.

u201cWell planned kaayo ang krimin. Mga professional gyud ang nihimo niini sama sa mga gun-for-hire,” matod ni Albuera.

Di sila makasulti kon vigilante ba sanglit wa silay nadungog nga naglihok sa lungsod sa Argao, dugang niya.

Wa hinuon nila isalikway nga ang pagkalambigit ni Amarillo sa illegal nga drugas maoy usa sa mga posibleng motibo sa pagpatay.

Posible sab nga personal grudge.

Si Sr. Supt. Erson Digal, director sa kapulisan sa lalawigan sa Sugbo, niingon nga nabutang sa watch list sa Provincial Anti-Illegal Drugs Special Operations Task Force (PAIDSOTF ) si Amarillo diin nadakpan na usab kini nila niadtong 2008. Nakuhaan siyag armas ingon man shabu.

Matod pa ni Digal nga daw naibtan usab sila og tunok subay ning pagkamatay ni Amarillo sanglit taud-taud na kining nibalik sa pagpamaligya og shabu human usab makapiyansa sa iyang mga kaso.

Giklaro ni Digal nga naglisod sila sa kapulisan sa pagdakop kang Amarillo sanglit adto kini mobaligya sa laing balay samtang mag-istar sa laing balay.

Nagtuo si Digal nga nagkaaway ang grupo sa mga drug pusher nga kauban ni Amarillo hinungdan nga siya gipatay.

Gilantaw usab nila ang anggulo nga posibling dunay nasuko niini tungod kay naila kining isog sa ilang dapit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph