Inahan, anak gibihag, gidunggab sa suspek

INAHAN ug anak nga babaye ang samdan dihang gipangdunggab sa paryente sa bana sa biktima human napakyas ang plano nga pagpanulis sa Barangay Pit-os, dakbayan sa Sugbo niadtong Sabado sa gabii.

Si SPO4 Alejandro Sarvida, desk officer sa Talamban Police Station sa pakighinabi sa Sun.Star Superbalita nii­ngon nga unang gi-alarma nga gipanghostage ang mga biktima sud mismo sa ilang balay, base sa gi-report sa nagpakabana nga sibilyan sa maong kwerpo sa kapulisan.

Alas 8:30 sa gabii, ang mga biktima nga sila si Erlinda Maglasang, 47, inahan ug anak nga si Crisha Maglasang, 12, kauban ang ubang mga miyembro sa pamilya nga sila si Rey Jumar, Dexter ug Jojo Maglasang ang nanan-aw og TV sud sa ilang panimay dihang kalit lang nisud ang suspek nga nagsul-ob og maskara.

Ang suspek unang nition og Batangas knife ngadto sa inahan ug ni­­demanda dayon og kwar­ta apan nibalibad kini hinungdan nga siya gi­dunggab sa iyang tuong hawak, wa’ng bahin sa agtang ug wa’ng bahin sa nawong dapit sa dunggan.

Ang biktima nakahigayon pa pagtangtang sa maskara nga gisul-ob sa gikaintapan ug nailhan kini nga si Jessie Borbajo, 20, ulitawo, paryente sa iyang bana nga naa magpuyo sa ilang balay.

Si PO1 Esmer Escultor sa Homicide Section sa Cebu City Police Office niingon nga pag-umangkon sa bana ni Erlinda ang suspek.

Samtang­ nakiglayog si Erlinda ni Borbajo, nisu­­­­way pagtabang ang batang biktima nga si Crisha ug nihangyo sa suspek pinaagi sa pag-ingon “Ayaw na tiyo!”, apan gidunggab na hinuon siya niini sa tuong bahin sa iyang lawas.

Human sa hitabo, da­ling nisibat si Borbajo nga way nadala nga kwarta ug wala na maabti sa nirespondi nga mga pulis gikan sa Talamban Sta­tion pinangulohan ni P/Insp. Arriza Otida ug sa mga sakop sa Speci­al Weapons and Tactics (Swat).

Ang mga biktima dali nga gidala sa ilang mga kabanay sa North Gene­ral Hospital sa siyudad sa Sugbo diin sila nagpaalim sa naangkong mga samad dinunggaban.

Ang Homicide Section sa CCPO maoy nag-im­bestigar sa hitabo ug nisusi sa motibo sa krimen ug sa gitagoan ni Borbajo. SCG/dugang taho sa Sun.Star Cebu

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph