INAHAN sa kanhi tresurera sa barangay nga gikiha sa Ombudsman kritikal human girakrakan sa duha ka lalaking nagsakay sa motorsiklo niadtong Dominggo sa alas 3:00 sa hapon sa Barangay Captain Claudio, dakbayan sa Toledo.
Ang biktima mao si Lilia Pellerin, hingkod ang panuigon, nakaangko'g daghang samad sa nagkadaiyang parte sa lawas.
Siya maoy inahan ni Marlene Gonzales, kanhi tresurera sa nahisgutang bBarangay nga gipasakaag kaso ni Kapitan Alexander Alquiza niadtong miaging semana.
Si Chief Insp. Michael Anthony Bastes, hepe sa Toledo police nga nahinabi sa dySS Super Radyo ug Sun.Star Superbalita, nagkanayon nadakpan nila sa hot pursuit operation ang duha ka mga suspek nga sila si Boboy Juarez, 50, minyo, ug Antonio Juarez, 56, pulos taga Barangay Sangi, Toledo.
Si Chief Insp. Bastes niingon nga ang krimen dunay kalambigitan sa pagbanhig usab ni Alquiza sa miaging semana, diin ang mga suspek usab ilang nadakpan.
“Bawosbawos naman ni sila gud kay kaila man ni kapitan kining among nadakpan pero dili pa makaingon nga gisugo kay nagpadayon pa ang atong imbestigasyon,” dugang ni Bastes.
Gipadayag niini napadali nila ang pagsikop sa mga suspek human positibong nailhan sa anak nga saksi nga si Marlon Pellerin, 37. (GPL)