Internet cafe gitulis, tulisan nagpatabang pa

USA ka internet cafe ang gitulis sa nag-inusara nga lalaki mga alas 7:30 sa buntag kagahapon sa C. M Recto Avenue, siyudad sa Cagayan de Oro.

Sa inisyal nga imbestigasyon sa Police Station 3 (PS3) sa Agora, nasayran nga gitionan og wala matino nga armas sa tulisan ang kahera sa Cyberbee Internet nga mao si Aprilyn Niña Mutya, 20, residente sa Barangay Carmen ning siyudad.

Gibutyag ni Mutyag sa Sun.Star Superbalita nga grabe nga kahadlok ang iyang gibati ug nawala siya sa iyang hunahuna dihang gitionan na siya sa tulisan.

Samtang makita pinaagi sa closed circuit television camera nga naghulat kining suspetado nga makagawas ang una nga kustomer maong internet cafe dayon kalit niini nga gisira ang pultahan ug bunlot sa dala niini nga armas.

"Giingnan ko niya nga dalha ning printer mao gihatud nako tabok sa kalsada," butyag ni Mutya.

Samtang gibitbit sa kahera ang printer, bitbit usab sa tulisan ang CPU patabok sa dalan dihang usa ka taxi ang nihunong diin dunay pasahero nga nikanaog ang gisakyan usab sa suspek.

Apan pakyas ang kahera pagkuha sa plate number sa maong taxi.

Si SPO3 Luisito Ugat sa PS3 niingon nga dako ang posibilidad nga masikop ang suspetsado tungod sa cctv ingon man dako usab unta nga tabang kong nakuha pa ang numero sa taxi.

Gibutyag ni Ugat nga unta nagpatabang ang kahera samtang patabok sila sa kalsada.

Nadala sa maong suspetsado ang 3 in 1 nga printer, Epson Brand nga nagkantidad og P10 mil, usa ka CPU, AMD brand nga mobalor og P10 mil ug P900.

Ang suspetsado gihulagway nga naka-jacket og itom, nakashort pants og kolor puti, nakasul-ob og kalo, medyo bulaw og buhok, dako ang mata ug pula kini, gibana-banang nag-edad og 27 ngadto sa 35 anyos, 5’9 ang bana-bana nga gitas-on niini, medyo taason og ilong ug sakto lamang ang kolor sa pamanit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph