NIHULGA ang taas nga opisyal sa lalawigan sa Southern Leyte nga paryenti sa 16 anyos nga maanyag nga babaye, kinsa gipasanginlang nangawat og senina sa usa ka tindahan, nga mopasakag kaso batok sa mga tawo nga nagpakauwaw sa menor de edad.
Nag-viral na sa social networking sites ang mga hulagway sa dalaga nga gibuhian sa kapulisan, apan gi-custody og balik una pa gitugyan sa Department of Social Welfare and Services.
Samtang usa ka ilado nga psychiatrist dinhi sa Sugbo nanawagan nga hunungon na ang maisip nga cyber bullying sa batan-on.
Si Dr. Rene Obra niingon nga andam siyang motabang kon duna kiniy sakit nga psychological.
Sa mga hulagway sa 16 anyos sa social networking sites, grabe ang mga pagsaway nga iyang nadawat gikan sa mga netizens.
Ang iyaan sa menor de edad nga nahinabi sa Sun.Star Superbalita, niingon nga ang dalaga di angay nga makadawat og ingon ani nga matang sa pagtratar sa publiko.
Matod niya nga gitun-an na karon sa pamilya ang posebling pagpasakag kiha sa maong mga tawo.
Ang ngan sa iyaan gipugngan ning mantalaan subay sa iyang hangyo.
Iyang gipasabot nga mahimong nasayop ang iyang pag-umangkon, apan silang mga sakop sa pamilya wa magpabaya.
Sa iyang bahin, si Obra sa Vicente Sotto Memorial Medical Center Department for Behavioral Science, niingon nga nga base sa iyang report nga nadawat, adunay sakit nga kleptomania ang batan-on.
Iyang gipasabot nga ang kleptomania usa ka sakit sa panghuna-huna, diin ang usa ka tawo nga duna niini di makapugong sa pagkuha sa mga butang nga ilang magustuhan.
Iyang gipsabot nga mahimo pa kining matambalan ug andam siyang motabang sa maong menor de edad.