OPISYAL nang giretiro sa Cleveland Cavaliers ang No.11 jersey sa 7’3” nga higante nga si Zydrunas Ilgauskas sa emosyunal nga programa atol sa halftime tali sa duwa sa Cavaliers ug New York Knicks sa Quicken Loans Arena kagahapon sa National Basketball Association (NBA).
Sa kasaysayan sa Cavaliers, si Ilgauskas maoy ikapitong magduduwa nga nakadawat ning maong pasidungog sunod nila ni Austin Carr, Nate Thurmond, Bobby “Bingo” Smith, Larry Nance, Brad Daugherty ug Mark Price.
Ang tanan pulos angayan sa maong pasidungog apan ang selebrasyon alang kang Ilgauskas mas labaw kumpara sa uban.
“Throw basketball stuff out the window,” batbat ni Cavs coach Mike Brown. “He’s a terrific human being.”
Nakig-uban ni Ilgauskas sa programa mao ang iyang asawa nga si Jennifer, ilang duha ka adopted nga mga anak, iyang mga ginikanan, kanhi tag-iya sa Cavaliers nga si Gordon Gund, ug kahigalaan lakip na niini si superstar LeBron James.
“Probably one of the most talented guys I ever played with,” asoy ni James kabahin kang Ilgauskas.
Atol sa seremonyas, nagpaka-low profile lang si James kay dili siya gustong matabunan sa iyang presensya ang iyang kanhi kauban sa Cavaliers.
Dihang hinayhinay nang gisaka ang jersey ni Ilgauskas, miuyog ang kanta sa sikat nga banda nga U2 nga giulohan og “Beautiful Day.”
Si Ilgauskas nahimong NBA All-Star sulod sa duha ka mga higayon. Siya maoy Cavaliers career leader sa rebounds (5,904), games played (771) ug blocks (1,269). Ikaduha siya sa scoring sa Cavaliers sunod ni James. (AP/ESL)