ILIGAN CITY -- Miduso karon ang Iligan City Peace and Order Council (ICPOC) ning siyudad og resolusyon nga hangyuon ang Coordinating Committee on the Cessation of Hostilities (CCCH) nga bungkagon ang gikatahong training camp nga nahimutang sa Sitio Limunsudan, Barangay Rogongon, ning siyudad.
Kini human gikumpirma ni Lieutenant Colonel Anton Abrina, commander sa 4th Mechanized Infantry Battalion, Philippine Army, atol sa gipahigayon nga panagtagbo sa ICPOC, Martes, Marso 10, nga adunay usa ka bodega nga gihimong training camp sa Moro Islamic Liberation Front (MILF) sa maong dapit.
Sa mga na-unang interview sa Sun.Star Superbalita ngadto kang Abrina, miingon kini nga nadiskubrehan nila sa ilang pagbisita sa maong dapit ang mga kahoy nga rifle o armas nga maoy gigamit sa mga membro sa grupo sa ilang pagbansay.
Lakip nga ilang nakuha ang mga papel nga nagpamatoud nga adunay ikaduhang hugna o second batch nga training nga ipahigayon karong bulan sa Marso.
Ang unang hugna gipahigayon niadtong bulan sa Mayo tuig 2014 nga gikumpirma kaniadto sa kanhi kumander sa 4th Mechanized Infantry Battalion, PA nga si Lieutenant Colonel Danilo G. Ibon.
Hinoon, miingon si Iligan City Mayor Celso G. Regencia nga dili kini angaya’ng kabalak-an sanglit kanunay man kini gi-monitor sa mga otoridad.
Apan bisan paman, nanghinaut pa gihapon ang kagamhanang lokal nga mohimo og aksiyon ang CCCH kabahin sa ilang hangyo tungod kay dili malikayan ang mga kabalaka sa katawhan sa Iligan.