GIPAHIBALO sa Davao City Police Office (DCPO) nga gialerto nila ang kapulisan aron masegurong malinawon ang pagsaulog sa Semana Santa dinhi sa siyudad sa Davao.
Daghang mga pulis ang gipakatag sa mga nagkadaiyang exit ug entry points sa dakbayan nunot sa kasaulogan.
Kini ang gisulti ni DCPO director Police Sr. Supt. Vicente D. Danao Jr. atol sa pakighinabi kaniya sa mga tigbalita.
Sumala ni Danao nga gidid-an niya nga mo-leave ang iyang mga sakop sugod sa Abril 17 hangtod sa Abril 20 sa Easter Sunday aron masegurong dunay pulis nga mobantay sa palibot atol sa Holy Week.
"Wala munang day-off ngayon. Seguridad ng Dabawenyo ang unang concern natin sa lahat ng panahon, lalo na sa ganitong okasyon," ingon ni Danao.
Ang kapulisan nagpahimangno nga kandadohan ang panimalay kung manlakaw aron di sak-on sa kawatan.
Subay niini, ang Davao City Overland Transport Terminal (DCOTT) uban sa Task Force Davao ug DCPO nagmuntar na og Police Desk Assistance.
Gihimo sa awtoridad ang makuting pagrekisa sa mga bagahe nga gikalipay sab sa mga pasahero aron luwas sila sa pagbiyahe.
Kauban sa TF Davao ug DCPO ang K9 Dog Unit ug Regional Public Safety Battalion (RPSB) sa pagpatuman sa hugot nga seguridad sa pantalan, terminal sa bus ug Davao International Airport.
Gilauman nga karong adlawa, Miyerkules, dagsaon sa katawhan ang mga terminal sa manguli sa tagsa-tagsa ka probinsya aron didto saulogon ang semana santa.
Ang Land Transportation Office nag-inspeksyon na sa mga bus una kini mobiyahe aron mapanegurong luwas ang katawhan samtang magbiyahe padung sa mga probinsya. (Jeepy P. Compio)