Kapuyo sa negusyante, patay na sab

PATAY na ang gikatahong live-in partner sa usa ka negusyante nga gipusil patay samtang nagmaneho sa iyang sakyanan didto sa ilang balay sa GSIS Heights, Barangay Matina Crossing, siyudad sa Davao niadtong Mayo 19, 2011.

Si Lorena Nebria, 24, negusyante, gikatahong namatay alas 10:00 sa gabii niadtong Sabado sud sa Davao Doctors Hospital.

Ang progress report sa Talomo Police Station, nagpahibalo nga wa nakaantos ang biktima sa iyang samad nga naangkon human sila gipusil sa wa mailhing mamumuno alas 3:20 sa kaadlawon niadtong Mayo 19.

Si Nebria nakaangkon og samad sa iyang ulo human gipusil iyang live-in partner nga si Tenny Torrejano, 36, nagpuyo sa No. 35, Saturn Street, GSIS Heights.

Base sa inisyal nga imbestigasyon sa kapulisan, nahitabo ang pagpamusil samtang pauli na ang mga biktima sakay sa ilang itom nga Toyota Fortuner nga dunay plate number LGG-934.

Nasayran nga ang biktima misud na sa ilang entrance gate sa balay, apan gisugat sila sa usa ka lalaki nga nagpahipi sa poste sa kuryente.

Ang maong killer giingon nga armado og .45 kalibre nga pistola base sa mga basiyo sa bala nga nahipus sa mga operatiba sa Scene of the Crime Operatives (Soco)-Northern Mindanao.

Sanglit abli ang bintana sa sakyanan, nakahigayon ang mamumuno sa pagpusil sa mga biktima kinsa giablihan sa ilang katabang sa balay nga si Anthony Morales.

Gikataho nga human nasiguro nga naigo ang mga biktima sa ilang mga ulo, ang mamumuno daling mibiya ngadto sa wa matino nga lugar samtang ang mga biktima daling gidala sa hospital.

Mga imbestigador nagsusi na karon sa motibo sa mamumuno nganong iyang gipatay ang biktima.

Sa pagsuwat ning balita, padayon pa ang imbestigasyon sa kapulisan aron sayron ang motibo sa mga mamumuno. (Alger Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph