Karon ug ugma usa ka pagpaabot

Tol Colita Barriga

Catmon, Cebu

DILI na kinahanglan litukon pa

Ang matam-is nga mga pulong

Aron danihon ko ikaw pag-usab

Sa pagpatuo sa katim-os sa akong gugma.

Wa na sab kinahanglana ang magbabalak

Aron hubiton ang katahom sa usa ka bulak

Kay ang katahom ug katam-is sa bulak

Magpabilin bisan way dila sa magbabalak

Nga motukib sa maong butang.

Ang katiunay sa usa ka gugma

Magpabilin nga tim-os ug matuod

Bisan wa pa ang pinulongan

Kay ang butang nga nagpakita

Sa iyang pagkasiya mao gayud kana siya

Ug labawng molitok daghang pulong

Sa ubang pinulongan ning kalibutan.

Ang karon ug ugma usa ka pagpaabot.

Apan hangtod kanus-a ako maghulat?

Magpaabot ba ako sa butang nga di mahitabo

Ug sa binuhat nga dili mobutho?

Ang ugma mahimong madag-umon

O may masanag nga adlaw.

Apan mahimong matahom nga adlaw ang ugma

Kon ang Adlaw masaaron ug puno sa paglaom

Nga mosidlak ning kinabuhi.

Busa karon ug ugma ako magpaabot!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph