Kawatan ga-text pa sa tag-iya human mangawat

USA ka pribadong establisemento nawagtangan sa ilang mga butang nga mobalor og P18,000 ug uban pang bank checks, mga automated teller machine (ATM) cards ug bank pass book.

Human mangawat, nag-text pa ang kawatan ngadto sa tag-iya sa kompaniya sa iyang gibuhat.

Ang kompaniya nga gilungkab niadtong Lunes sa alas 10:45 sa gabii mao ang Grand Vista Finance Corporation sa CRMDC building, sa may A. S. Fortuna street, Banilad, Mandaue City.

Usa ka Jayme Sainz, tag-iya sa kompaniya, maoy ni-report ngadto sa kapulisan pasado alas 10:45 sa gabii.

Matod niya nga nakadawat sila og text message labot sa giingong gipadala sa wa mailhing tawo nga nagpahibawo labot sa nahitabo sa ilang opisina ug gihimo kini isip usa ka panimawos.

Sa mao usab nga mensahe, ang gikatahapan na­ngayog kuwarta sa tag-iya ug di mosulti ni bisan kinsa ilabi na sa kapulisan.

“Gud evening Grand Vista. Kindly check ur office ds time becoz  I think u don’t like what happen, but 8 started wid u and dat is my revenge. Just don’t call anybody to ask help like police……..only u can help urself f u want to negotiate me so that ur lost items back asap,” matod sa text message nga nadawat sa tag-iya.

Human sa hitabo, dali silang ni-report ngadto sa kapulisan hinungdan nga ang mga sakop sa MCPO’s Investigation and Detective Management Board (IDMB) daling nisusi sa lugar pinangulohan ni PO2 Roldan Balingbing.

Atol sa inspection, ilang nakita nga buak na ang bildo ug gipugos na sa pag-abli ang buhatan ug nawagtang na ang nahisgutang mga butang.

Sa pagkakaron, ang mga pulis padayon pa sa ilang gihimong imbestigasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph