‘Kawatan’ gi-shotgun

KRITIKAL ang kahimtang sa usa ka lalaki human gipusil sa sekyu dihang nasapon nga nangawat sulod sa umahan nga gipanag-iyahan sa Capitol University (CU) kagahapon mga alas 5:00 sa kadlawon sa Lumbia, ning siyudad sa Cagayan de Oro.

Giobserbahan pa sa mga doktor ang biktima nga mao si Jason Nacua, hingkod ang edad, taga Amoros, siyudad sa El Salvador, Misamis Oriental.

Boluntaryo usab dayon nga mitahan sa Police Station 8 (PS8) sa Lumbia ang security guard sa CU farm nga mao si Arnel Ancheta ug maoy nisaysay sa kapolisan nga iyang napusilan ang suspek tungod kay nagbitbit naman kini og mga appliances.

Si Police Senior Inspector Ericson Sabanal hepe sa PS8 nibutyag nga giingong misulod sa umahan si Nacua ug giingong nangawat og mga appliances sulod sa balay nga anaa sa farm.

Dihang nakita sa sekyu gi-shotgun niya ang duha ka tiil, hinungdan nga nakaangkon ug dako nga mga samad ug anaa sa talandugon ang kahimtang.

Matud ni Sabanal nga standard operating procedure niining mga security guard nga kung makasulod sa ilang area labina pribado nga propredad ug dili maila ang tawo labina sad nga nagbitbit na og gamit, pusilon gyod kini.

Ang sekyu deretso usab dayon nga mitahan sa iyang kaugalingon sa PS8.

Samtang ang biktima daling gidala sa kapolisan sa JR Borja Memorial Hospital ug gikatakdang ibalhin sa Northern Mindanao Medical Center (NMMC) tungod sa talandugon nga kahimtang.

Ang medical social worker sa JR Borja Hospital nanawagan sa mga ginikanan ug paryente sa biktima nga bisitahon kini sa maong tambalanan sa dili pa dalahon sa NMMC.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph