Kon ikaw ang pahukmon: Sukmagay sa hubog

SAMTANG diha sa sulod sa iyang balay si Nestor, iyang nahibaw-an nga ang iyang duha ka mga bisita nga kauban og inom gikulata. Sila si Ronni ug Jessie nanag-inom sa tindahan sa iyang anak.

Busa, niadto gilayon si Nestor aron mangutana kon unsa ang nahitabo. Kalit nga nibarog si Ronnie, dayon nangutana kon kauban ba niya ang mao nga mga tawo, dungan sa pagkulata kaniya. Wa makapanalipod si Nestor kay siya nakalitan.

Nakahigayon si Nestor sa pagbawos, apan wa siyay dag-anan ni Ronnie. Nakakita si Julie, asawa ni Nestor, sa away. Iyang nakit-an sila si Ronnie ug Jessie nga nikulata sa iyang bana hinungdan nga iya kining giuwang. Apan ang duha wa gyud maminaw kaniya.

Aron makalikay, nikaratil pagdagan si Nestor ngadto sa ilang balay ug nisunod usab si Julie. Gisultihan ni Nestor ang iyang asawa sa pag-report sa barangay hall sa nahitabong sinukmagay.

Apan samtang naglakaw si Julie padung sa barangay hall kuyog ang iyang anak nga lalake, ilang nasugatan si Ronnie, kinsa nibabag sa agianan. Gikomprontase ni Ronnie si Julie dayon nipgawas sa iyang pusil. Gitiunan si Julie tumong sa agtang dayon nangutana kon “gusto ka ini?”

Bisan sa makahahadlok nga kasinatian, nakalahos pa gyud si Julie sa barangay hall ug nakataho kalabot sa sinukmagay ug pagpanion og armas.

Apan lain sab og bersyon si Ronnie sa hitabo. Matod niya nga naglakaw siya uban sa iyang 3-anyos nga anak dihang si Nestor, kinsa hubog ug nagmaoy, nibabag sa iyang agianan. Nangutana kini kaniya kon nasuko ba siya niini.

Nisulti si Ronnie kang Nestor nga wa siyay kasuko. Apan bisan pa niini, gisukmag gihapon siya tumong sa nasod hinungdan nga siya natumba. Giseguro ni Ronnie nga di maunsa ang iyang anak. Iya dayong gibaslan pagsukmag si Nestor.

Samtang giuwang sila sa mga tawo, gidala siya ngadto sa tindahan sa anak ni Nestor.

Apan gigukod siya ni Nestor ug gisukmag na sab.

Usa ka tawo nga nagdala og kutsilyo moduol unta kang Nestor apan gipugngan siya ni Ronnie. Si Jessie wa usab mosukmag kang Nestor. Nanghimakak usab si Ronnie nga iyang gitiunan og pusil si Jessie.

Kinsa kahay nagsulti sa tinuod, sila si Julie ug Nestor o sila si Jessie ug Ronnie?

Sila si Jessie ug Ronnie gipasakaan og kasong slight physical injury. Si Ronnie gikiha usab og grave threat. Sad-an ba ang mga akusado, kana kon ikaw ang pahukmon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph