Konduktor gipusil sa laing konduktor sa Danao terminal

NAGKAGULIYANG ang terminal sa siyudad sa Danao human gipusil ang usa ka konduktor sa sakyanan sa laing konduktor, pasado alas 11:00 sa miaging buntag.

Ang samdan sa iyang wa nga kilid mao si Michael Jayme, hingkod ang panuigon, ug taga Hubay, lungsod sa Lilo-an.

Gitumbok nga namusil ug nasikop sa kapulisan sa Danao mao si Felix Estomayo, 41, taga Barangay Suba, Danao.

Sa taho nga nasayran gikan kang SPO2 Eldefonzo Prosia sa Danao City Police Office (DCPO) nagbutyag nga nakadawat sila og taho gikan sa usa ka nagpakabanang molupyo bahin sa hitabo.

Mao kini hinungdan nga si SPO1 Ryan Batiquin ug mga kauban daling nitubag sa alarma.

Sa pasiunang imbestigasyon sa kapulisan, nasayran nga nag-abot ang biktima ug ang suspek sa dapit ug nagkalalis. Wa magdugay, nibunot og armas ang suspek ug gipusil ang biktima.

Si Estomayo nisuway sa pagsibat apan nasikop sa niresponding kapulisan.

Si Jayme gidala sa Danao District Hospital apan gibalhin sa usa ka tambalanan sa siyudad alang sa dugang pag-atiman.

Nabawi gikan sa suspek ang usa ka .357 magnum uban sa lima ka mga bala ug usa ka kabhang ingon man batangas knife nga iyang posisyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph