POSITIBONG gitudlo sa kapitan sa Barangay Captain Claudio, dakbayan sa Toledo ang suspek nga mibanhig kanila didto sa Barangay Carmen sa naasoyng siyudad nga mikutlo sa kinabuhi sa iyang live-in partner nga usa ka konsehal sa iyang barangay.
Si Kapitan Alexander Alqueza nagpaalim karon sa iyang samad sa usa ka pribadong tambalanan sa dakbayan sa Sugbo.
Nasayran nga giduaw sa hepe sa kapulisan sa Toledo nga si Chief Insp. Michael Anthony Bastes aron ipakita ang hulagway sa suspek ug giingong positibo kining gitudlo sa kapitan.
Matod ni Bastes nga duna na silay suspek nga iya rang gihulagway nga local boys nga maoy nagsilbing gunman.
Giingong duna nay mga kaso nga giatubang ang suspek tungod gihapon sa pagpamusil didto sa dakbayan sa Toledo.
Apan, wa lang una nganli ni Bastes kon kinsa kining suspek samtang padayon pa ang ilang pagpangita niini. (DRT)