Kontrobersyal nga kapildihan

NATUMAN gyud ang bahad ni American Timothy Bradley nga iyang pakagingon ang kalibutan dihang iyang gilupig si 8-time world champion Manny Pacquiao pinaagi sa split decision kagahapon sa MGM Grand Arena sa Las Vegas, USA.

Dumadaog man tuod si Pacquiao alang sa panan-aw sa kadaghanan apan lahi ang nakita sa duha ka judges, nga ningpadaog kang Bradley sa parehong puntos, 115-113. Mao sab ang puntos nga gihatag sa usa ka judge nga nagpadaog kang Pacquiao.

Ang kapildihan maoy labing unang naangkon sa Pamban­sang Kamao sa Pilipinas sa miaging pito ka mga tuig ug na­ka­putol sa iyang 15 ka sunodsunod nga kadaugan nga nagsugod niadtong 2005.

Nasuko kaayo si promoter Bob Arum, ninglanog ang boo sa venue, ug tatawng nakurat gyud og maayo si Pacquiao human gianunsyo ang desisyon.

“I’ve never been as ashamed of the sport of boxing as I am tonight,” batbat ni Arum, kinsa maoy nagdumala sa duha ka mga boksidor.

Si Bradley, kinsa diriyot nang malukapa sa tungatungang bahin sa away, midaog og lima sa katapusang unom ka rounds sa scorecards sa duha ka judges ug upat sa laing judge.

“I did my best. I guess my best wasn’t good enough,” matod ni Pacquiao.

Sa sayong rounds, saktong binukbokay ang nasak­sihan apan sa ulahing rounds, nausab ang templa sa away ug talagsa na lang manukmag si Pacquiao sam­tang si Bradley mikugi’g panukmag aron makahakot og puntos.

“I thought I won the fight,” asoy ni Bradley. “I didn’t think he was as good as everyone says he was. I didn’t feel his power.”

Sa ringside statistician, nakapasulod og 253 ka mga kumo si Pacquiao kumpara sa 159 ni Bradley.

Sa wala pa ang away, daan nang dako og pagsalig si Bradley nga mailog niya ang World Boxing Organization (WBO) welterweight title gikan kang Pacquiao.

Gani sa katapusang presscon sa away, nagdala si Bradley og tiket nga gipadako nga nagprinta sa ilang rematch ni Pacquiao karong Nobiyembre 10.

Naa sa kontrata nga gipirmahan sa duha ka mga boksidor nga adunay dinaliang rematch sa sitwasyon nga mapilde si Pacquiao, nga gyud tuod ang nahitabo.

“Can you believe that? Unbelievable,” dugang ni Arum. “I went over to Bradley before the decision and he said, ‘I tried hard but I couldn’t beat the guy.’”

Nagkanayon si Bradley nga nagsakit ang iyang tiil sa 2nd round ug gisultihan siya sa iyang trainer nga puwede siyang moatras sa away kon kinahanglanon.

“I got my second wind in the sixth round,” asoy ni Bradley. “I worked the angles, sticking and moving.”

Nagkanayon si Pacquiao nga wala gyud siya masakiti sa mga kumo ni Pacquiao kay kadaghanan niini masangit man sa ihang kamot ug nagtuo siya nga kontrolado gyud niya ang away.

“He never hurt me with his punches, most of them landed on my arms,” pasabot ni Pacquiao.

Giangkon ni Arum nga dako gyud og kwarta ang nakatangag sa rematch apan dako gyud siyang supak sa resulta.

“I’ll make a lot of money off the rematch, but this was outrageous,” batbat ni Arum.

Si Bradley adunay 29-0, 12 KOs nga rekord samtang si Pacquiao natagak sa 54-4-2, 38KOs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph