MIREKLAMO ang Koreano nga gihulga ug gipasakitan ang mabdos niyang asawa dihang matod pa gipaninglan kini sa iyang utang.
Ang kapulisan sa Talamban Police Station nakadawat og tawag gikan sa usa ka Koreano tungod sa giingong mga armadong tawo nga sakay sa usa ka pribadong sakyanan.
Sa dihang naalarma, na-intercept sa kapulisan ang sakyanan nga van type multicab ug nasayran nga naningil diay sa utang sa Korean national nga si Park Dae Ho nga nanawag sa kapulisan.
Giingong utangan og P90,000 ang Koreano sa usa ka Gregorio Dalagdon apan matod sa Koreano nga gikilkilan ug gihadlok ang iyang asawa nga nagsabak og walo ka buwan og hugot nga gihimakak nga duna kini nautangan nga tawo sanglit di mahitabo nga aduna siyay utang tungod kay aduna siyay P6 milyones sa iyang pag-anhi sa nasod.
Ang grupo sa usa ka Fred Naval niadto sa Sunny Hills Talamban bitbit ang final demand letter gikan sa usa ka Atty. Allan Frederick Blanco aron pagpaningil sa utang sa Koreano.
Kauban ni Naval ang higala niining pulis nga si PO2 Romeo Jumalon, ang kanhi police nga si SPO1 Dennis Malazarte nga na-dismiss tungod sa kasong murder ug ang driver nga si Arman Lampinaque.
Hinuon, nagkasabot ra ang duha ka partido sud sa Talamban Police Station samtang gipaabot pa nila ang reklamo sa Koreano nga gidapatan ang iyang mabdos nga asawa. (DRT)