Kuyaw nga Pacquiao mokontra kang Bradley

GIANGKON ni assistant trainer Buboy Fernandez nga halos di na niya makaya nga sagangon ang kinumo ni Rep. Manny Pacquiao sa gihimong punch mitts session.

Matud ni Fernandez, sa pagkakaron kuyaw gayud ang ginapakitang kusog, kapaspas ug kaabtik ni Pacquiao kumpara sa mga milabay away niini.

Sa pahayag ni Fernandez, sa matag sparring mitts nila ni Pacquiao, nasinati niya ang kahapdos mao nga nag-andam siya pirme og "pain reliever."

Gani, bisan si Hall of Fame trainer Freddie Roach miingon nga naglisud usahay siya sa punch mitts tungod sa kapaspas ni Manny.

Una nang gisulti ni Roach nga mas determinado karon si Pacman nga patumbahon si Bradley aron ibangon usab ang iyang pangalan.

Dugang pa niya, sa nakalabay nga katuigan mas grabe ang gihimo ni Pacman sa training tungod sa motibasyon niini.

Hangtud karong adlawa na lang ang sparring session ni Pacquiao diin tulo hangtud upat nga round ang himuon sa Wild Card Gym una molupad padulong sa Las Vegas sa Abril 7.

Ang Bradley-Pacquiao fight masaksihan sa Abril 13 sa MGM Grand Garden Arena, Las Vegas, Nevada.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph