NAGLABI ang atong pagtuo nga dakog suweldo ang mga piniling opisyal ilabina sa presidente sa nasod. Natino nga P95 mil ang suweldo ni P-Noy ug P63 mil ra ang limpyo nga iyang madawat matag bulan kay kuhaan pa man sa mga deductions. Mas dako pa ang suweldo sa mga abroad nga nagdawat gikan sa kapin sa gatos ngadto sa kapin sa P200,000 matag bulan.
Apan nganong mag-ilog man sa paglansar nga gamay ra man diay og suweldo ug kon modaog magpas-an pa og dakong suliran sa nasod.
Maoy giagpas nga makabaton og garbo, dungog ug ang bulawanong mithi sa pangalagad. Hinoon, kon magsalig sa pangawkaw dako ang makuha nga salapi apan wala kini sa hiyas ni P-Noy kay ang ilang bansagon kapanaminan ang kalinis sa pangatungdanan.
PILOTO
Kadtong mga piloto nga namahawa sa ilang trabaho sa PAL nagdawatan diay kad-to sila og dako kaayong suweldo labaw pa sa presidente. Unya mipasangil nga dili sila regular ug kulang sa mga benipisyo sa kompaniya. Apan nasayran nga mi-resign sila tungod sa tanyag sa ubang airline company nga doblehan ang ilang suweldo. Tungod niini, nagtinguha ang PAL nga mintras nang-hire silag piloto mao lang usay mopalupad ang mga piloto sa Airforce. Haniti sila sa karaan nga eroplano, ang ato lang og makalitan sila sa pagmaneho sa moderno nga abyon sa PAL.
Awhagon lang nato ang mga pasahero nga magbalon kay maaberiya unya, wala rabay tindahan sa kawanangan.
BULAWANONG MITHI
Walay ikabugti nga kantidad sa salapi sa bulawanong mithi sa pangalagad ni P-Noy. Busa wala kini mag-apas sa suweldo. Gani, ang madawat mahurot lang sa pagpangayog tabang.
Apan ang tinguha sa presidente nga molambo ang nasod, dili kaha mamansahan sa politika. Dinhi sa Sugbo, daghang nabalaka sa pagpihig unya sa pangalagad ni P-Noy.
Gani, si Kongresista Benhur Salimbangon giabot og kabalaka nga dili maaprobahan ang iyang balaodnon nga maghimong economic zone sa kwarto distrito kay si Gibo rabay ilang gisuportahan.
SUWELDO SA MAMUMUO
Naghisgot kita og dagkog suweldo sa mga opisyal, apan unsa man ang lintunganay nga kahimtang sa mga mamumuo. Idlas kaayo ang ting-usbawan sa yano nga mga trabahante.
Dunay balita nga usbaw sa suhol apan ang mga kompaniya wala makatuman kay nagsangkiig sa kaapiki. Papirmahon og tagurha ka payroll. Ang papeles nga naghulagway sa minimum nga suholan maoy ipakita sa Dole samtang sa tinuoray ang mga empleyado nagdawat lamang og gamay nga suweldo. Pun-an pa nga contractual ang ilang estado nga giisip nilang kalbaryo sa panarbaho. Pero maayo nalang nang gamayg suweldo kay sa walay trabaho.
Duna pod hinuoy nagtrabaho apan walay suweldo-suweldo kay ang tagdumala naniguro lang sa ilang kaugalingon. Nagtuo siguro nga dili gutomon ang tiyan sa mga empleyado. Pagka-pait. Maayo pay mousap og panyawan kay matiam –tiam pa man.
(csa_1156@yahoo.com cell #: 0905-250-4643)