NAMATAY ang usa ka lalake nga nakigpinusilay sa mga pulis sa lungsod sa Balamban nga motunol unta sa warrant of arrest sa iyang igsuon niadtong Martes sa buntag.
Ang mga pulis igo lang nibawos human ang biktima unang nipusil sa mga pulis nga niabot sa dapit.
Ang namatay giila nga si Rolito Abanto, 43, taga barangay Bayong sa maong lungsod.
Niadtong Martes pasado alas 10 sa buntag, ang kapulisan sa Balamban pinangulohan ni SPO3 Allan Patalinghug, SPO2 Jude Dennis Aguanta, ug PO2 Arman Enriquez, niadto sa sityo Lantawan, barangay Maton-ug.
Ila untang itunol ang warrant of arrest batok sa igsuon ni Rolito nga si Jelly Abanto tungod sa kasong paghupot og marijuana.
Apan sa dihang niabot ang mga pulis ug wa pa gani makakanaog sa sakyanan, gipusil na sila sa biktima ginamit ang kalibre .45 nga pistola.
Gani giusban pa sila sa pagpusil apan wa na makabuto ang armas ug nakahigayon ang mga pulis sa pagbawos.
Si Enriquez maoy nipabuto sa iyang dala nga M-16 armalite rifle makaduha ka mga higayon.
Naigo ang biktima nga maoy nakaingon sa iyang hinanaling kamatayon.
Samtang ang igsuon niini nga mao untay tuyo sa mga pulis nakasibat human sa hitabo.
Nakuha gikan sa crime scene ang usa ka .45 caliber pistol nga adunay lima ka bala sa magazine ug usa ka kabhang sa bala.
Si SPO3 Eugene Macapaz nga nahinabi sa Sun.Star Superbalita niingon nga maayo nalang nga sa ikaduhang pagpabuto ni Abanto wa na makabuto ang pusil.
Maayo sab gani kay way pulis nga naigo.