Lalaki gipatay

MGA 14 ka samad ang naangkon sa usa ka lalaki nga nakaplagan nga wala nay kinabuhi sa kasagbutan nga bahin kagahapon mga alas 6:00 sa buntag sa Barangay Sta. Cruz, lungsod sa Tagoloan, Misamis Oriental.

Ang Scene of Crime Operatives (Soco) nakahipos og kalo, bonnet gikan sa cargo shorts niini nga kolor itom ug adunay kombinasyon nga pula ingon man cash nga P220 atol sa ilang pagsusi.

Apan wala silay nakita nga ilhanan nga nagpaila sa pangalan niini o mga identipikasyon.

Hinuon adunay naki-usyuso sa dapit nga taga lungsod sa Jasaan miingon nga nailhan niya ang maong biktima nga taga Jasaan apan igo lang nag-abang sa maong dapit, usa ka bulan pa lang sa maong lungsod ug giingong tambay lamang ug wala pa maila ang pangalan.

Bisan ang kapolisan sa Tagoloan Police Station nakapamilyar usab sa hitsura niini.

Unang gituohang usa kini ka habal-habal driver ug giilogan sa motor ug gipatay apan adunay usab mga pagduda nga suspek kini sa mga pagpanulis tungod sa bonnet nga dala niini gawas pa nga adunay kini dala dalahon nga hait nga hinagiban.

Nakaangkon kini og mokabat 14 ka samad sa iyang likod usa sa dughan nga bahin nga gituohang naigo ang kasing kasing gamit ang kutsilyo.

Nagsul-ob og jacket ang biktima nga kolor itom ug gipailawman usab og itom nga t-shirt, naka islander og sandal, gibana-banang adunay 5'4 ang katas-on, ug gituohang 25 ngadto 30 ang pangidaron sa biktima.

Ang kapolisan sa ilang inisyal nga imbestigasyon niingon nga posibleng walay nakakita sa insidente labina ang lugar layo ra kaayo sa suga, layo ra kaayo sa mga puloy-anan ug hilit nga dapit nga napuno pa og mga sagbot.

Sa pagsulat ning balita gidala na sa Everlasting Funeral Homes ang patayng lawas ug didto ipadayon sa Soco ang pagsusi kung aduna bay mga patik niini aron masuta unsay mga kalambigitan sa biktima. Gikatakda usab kining i-otopsiya.

Ang kapolisan usab mipaingon pa sa Jasaan aron pagkumpirmar kung ang biktima mao ba ang giingong borders lamang sa maong lungsod, nagtambay ug kanunayng makitang magsige og dala sa hait nga hinagiban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph