Lalaki nadat-ugan og pinutol nga mga kahoy

USA ka lalaking sakay sa motorsiklo nakutluan sa kinabuhi human nadat-ugan og mga pinutol nga kahoy gikan sa gisundang trak didto sa Purok 7, Barangay Cabaywa, lungsod sa Asuncion, Davao del Norte, Biyernes sa buntag.

Nailhan ang biktima nga mao si Macario Libitos Jr., 38, molupyo sa Purok 3, Barangay Binasbas, lungsod sa Laak, Comval Province.

Sa report gikan sa Davao del Norte Police Provincial Office, nasayran nga pasado alas 9 sa buntag, sakay ang biktima sa iyang motor gikan sa lungsod sa Laak, padulong sa siyudad sa Tagum.

Pag-abot sa maong lugar aksidenting nahulogan og mga pinutol nga kahoy ang biktima gikan sa iyang gisundang Mitsubishi Fuso nga trak de karga nga dunay plate number GFX-730 ug gidrayban sa usa ka Daniel Sayta, molupyo sa Purok 3-C, Barangay Poblacion lungsod sa New Corella.

Ang biktima nakahiagum og grabing bun-og sa kalawasan hinungdan sa iyang hinanali nga kamatayon.

Ang drayber sa trak wa na mihimo sa pag-ikyas ug mitahan sa iyang kaugalingon ngadto sa mga otoridad.

Patay'ng lawas sa biktima gihiluna na karon sa usa ka punerarya sa siyudad sa Tagum. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph