Langay nga suweldo sa mga J.O. gituki sa SP

GITUKI sa mga miyembro sa Sangguniang Panlungsod ang kalangay sa paghatag og suweldo sa mga job order employees sa City Hall ug sa Sangguniang Panlungsod.

Gipangunahan ni Barangay Kapatagan ug ABC President Juanito Morales ang pagtuki niini atol sa iyang privilege speech atol sa sesyon niadtong Huwebes.

Sumala ni Morales nga gibati niya ang kapait sa kahimtang sa mga J.O. kung dugay nila nga madawat ang ilang suweldo.

Nasayran nga tulo pa ka bulan ang paaboton una makobra ang ilang mga suweldo.

"Naa ta diri aron mo-legislate pero ang ato mismong mga empleyado wala diay nato mahatagi og tarong nga serbisyo. Mr. Chairman, maulaw ta kay kita mga opisyal dagko ta og suweldo mobati pa gani ta og kalisud, unsa pa kaha ning mga tawhana," sumala ni Morales.

Dugang ni Morales nga angay nga atimanon ang mga empleyado sanglit wa kini makaabot sa minimum wage.

"Tag P199 ra ang suweldo sa atong mga J.O., wa gani kaabot sa minimum wage kung atoa gyud ibase mao nga angay unta hatagan pod og pagtagad," tin-aw pa niya.

Samtang gikompirma ni Mayor Joseph Peñas sa Super Balita kagahapong adlawa, nga wala pa gyud makadawat ang mga empleyado sa ilang suweldo.

"Tinuod na kay sa kasamtangan wa pa god ta naka-supplemental budget. Pero last Thursday gipasa naman ang supplemental budget, so mao na ning panahona nga maka-suweldo ta sa mga J.O.," tug-an ni Peñas.

Sigon sa mayor nga imposibleng malangan ang suweldo sa mga empleyado kung naa lay supplemental budget kay gilayon siyang makapirma niini.

"Pero kung ang empleyado nga nagreklamo unya naglisud gyud kay wala pay suweldo, ato lang gi-advise-san nga mo-adto sa opisina unya puwede man siguro nga di lang sa motrabaho," pasabot sa mayor.

Alang ni Pe¤as, nakasabot siya sa kahimtang sa mga empleyado apan wa siyay mahimo tungod kay way makuhaan og pundo sa kasamtangan.

"Naluoy ko nila. Unya kung moingon nga ubos ang suweldo, so far mao ra man gyud na ang minimum rate sa siyudad. Ang ubang LGU dako pero mobayad pa man sila og pamasahe kay ang ilang opisina wa man mabutang sa sentro sa Digos. So pareha lang siguro," batbat pa ni Peñas.

Giklaro sa mayor nga renewable ang J.O. matag tulo ka bulan ug naa ra nila kon magpa-renew sila.

"Sa atong mga empleyado nga wa makauyon sa suweldohanan nga P200, puwede man siguro nga dili lang sila mo-report kung supak gyud sa ilang kabubut-on," hangyo ni Peñas. (Orlando Dinoy)

Related Stories

No stories found.
SunStar Publishing Inc.
www.sunstar.com.ph