Langob naa sa nahulpang yuta sa Dumanjug

DUNAY langob ilawom sa nahulpa nga yuta sa Sitio Plaza, Barangay Camboang, lungsod sa Dumanjug, habagatan-ka­­sadpan sa lalawigan sa Sugbo.

Mao kini ang nadiskobrihan ni Senior Science Research Specialist Abraham Lucero Jr., sa Mines and Geosciences Bureau sa Central Visayas dihang personal nga gisusi ang dapit kagahapon.

Ang pagtay-og sa 6.9 magnitude nga linog niadtong Pebrero 6, maoy gitumbok nga hinungdan ni Lucero nga natandog ang yuta sa lugar nga niresulta sa pagkahulpa niini nga gitawag usab og sinkhole nga niporma og daw sa usa ka dako nga kawa.

Nakatampo usab sa pagkahumok sa yuta, ang pipila ka adlaw nga pag-ulan nga nasinati sa Sugbo sa miaging semana.

Ang sinkhole nga nahimutang sa usa ka pribado nga luna dunay sukod nga 10 meters by 8.5 meters ang diameter ug ang gilawmon mga 3 ngadto sa 4 metros ug duna kini’y distansiya nga 11 metros gikan sa barangay road.

Si Lucero nga gikahinabi sa Sun.Star Superbalita kagahapon namahayag nga sa pagkakaron dili pa nila matino ang sukod o gidak-on sa langob ilawom sa sinkhole.

Kini tungod kay wa’y instrumento ang ilang buhatan alang niini nga matod niya mahal ug ang mga geotechnical companies nga manghimoay og mga edipisyo ug dams ang sagad makabaton niini.

Usa sa instrumento nga ilang gikinahanglan aron masusi ang langob mao ang gitawag og ground penetrating radar system (GPRS).

Bisan og layo sa kabalayan ang sinkhole, si Lucero niawhag ni Dumanjug Mayor Nelson Garcia ug Camboang Barangay Kapitan Meliza Mae Quirante nga dili mokompiyansa ug tumanon gyud ang mga rekomendasyon sa ilang buhatan aron paglikay sa disgrasiya.

Apil sa ilang rekomendasyon mao ang pagbutang og permanente nga barb wire sa nahulpa nga dapit aron dili makapaduol ang mga tawo, magbutang og signage nga dili pasudla ang maong dapit ug regular nga monitoron ang paglihok sa yuta.

Si Lucero nidugang nga mobalik pa siya sa lugar aron mohimo og dugang pagtuon labot niini.

Si MGB-7 regional director Loreto Alburo niingon nga common ang sinkholes sa mga yuta diin ang mga bato ubos sa land surface ginama sa limestone.

Sa sayo pa ang MGB-7 nagkanayon nga moabot ngadto sa 14 ka mga barangay sa lalawigan sa Sugbo ang dunay presensiya sa sinkholes.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph