Lariosa: Kon motalikod ang suod nga higala

KON motalikod ang suod nga higala mohilak ka di tungod sa iyang kamatayon kon di sa dakong kahinugon ug kamingaw. Kay di na man nimo siya makita dinhi sa kalibutan.

Di pa dugay, mitalikod na si Engr. Ricardo B. Dagatan, ang suod kong higala, human sa pipila ka buwan nga pakigtakos sa grabeng sakit sa kanser sa baga. Milagro gikan sa kahitas-an ra ang makabuntog ning maong sakit.

Ang tanang tawo ug mga butang dinhi sa kalibutan may katapusan. Kini ang barahan sa kinabuhi nga way makalalis ug makalikay. Ang tanan modawat bata o tiguwang, sapian o kabos ug si bisan kinsa.

Suod kong higala si Ric. Managkauban mi sa National Food Authority (NFA) Cebu sa dugayng panahon. Katloan ka mga tuig kong nasinati ang iyang pagkatawo.

Siya masinabuton ug may hataas mga pasensiya. Hinungdan nga wa gyud siyay gikaaway sa among buhatan. Sa way pagpanuko, nitahod siya sa iyang labaw ingon man sa iyang katupong. Way gipinig nga higalaon.

Si Ric matinud-anon sa iyang katungdanan. Siya mao ang Regional Engineer sa buhatan.

Kuti nga posisyon, apan wa makatibhang sa iyang kait-on ug kakugi pagpakita sa iyang gihuptang katakos.

Ang bantugang pilosopo sa karaang Tsina nga si Confucius namulong nga ang tawo mahimong imortal human sa iyang kamatayon kon siya nakasuwat og libro, nakatanom og kahoy ug may anak nga lalake.

Mahinumdoman ka tuod kon ikaw may libro kay basahon man sa katawhan. Kon molagbas sa kasigluhan ang imong gitanom nga kahoy mahiuban ka kanunay sa paghandom. Kon lalake ang anak madala ang imong bansagon ngadto sa umaabot.

Ako mopuno nga di sad ang tawo makalimtan kon maayo kang tawo sa batasan, taras ug kinaiya. Si Ric maayong tawo ug busa buhi kanunay sa kasingkasing niadtong nakaila kaniya ug nasayod sa iyang kabuotan..

Di ko makalimot kang Ric kay gawas sa iyang kaayo may nabuhat siya nga di ko makalimtan. Dihang gisuwat ko ang kasaysayan sa lungsod sa Carmen misanong siya sa akong hangyo nga iyang ubanan sa maong dapit kay taga didto ang iyang kaliwatan.

Dako kaayo siyang natabang kay gipaila-ila ko niya sa iyang uyoan nga maoy usa sa akong key informants. Agig bawos gipasalamatan ko siya sa “acknowledgment portion” sa maong basahon sa kasaysayan.

Niini, ang iyang ngalan di na sad makalimtan kay nag-una sa pahina sa kasaysayan sa iyang lungsod sa Carmen. Magbansiwag uban sa iyang kaliwatan.

Ang mga ginikanan ni Ric taga Carmen, apan siya nagdako sa Manila. Namalik sa Sugbo sila paglabay sa daghang katuigan. Iyang inahan bansagon nga ‘Buot.’ Kaliwat nga mga halangdon sa Carmen. Ang mga Buot maoy unang mga lider sa Carmen panahon sa mga Katsila.

Goodbye, my friend, daghan ang di makalimot kanimo. Hangtod sa sunod nga panagkita.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph