MIDAHUNOG ang dungog. Mibaha ang salapi alang kang Manny Pacquiao dihang gibuntog niya ang hambugiro nga Timothy Bradley sa Estados Unidos sa America niadtong miaging
Domingo sa Las Vegas.
Gilangkat niya pagbalik ang korona isip WBO welterweight champion of the world. Sa sinugdanan hangtod sa katapusan duha ra ang round ni Bradley.
Kanunayng sakat ang sinawng ulo ni Bradley sa naghagiyos nga kumo ni Manny. Duna hinuoy panagsa nga maigo siya sa kumo ni Bradley apan klaro nga baliwa lang ni Manny.
Si Bradley nga maigo sa kumo ni Manny masakitan dayog dagan-dagan sa ring. Nakabawos na gyud si Pacman human gi-mafia kuno sa miagi nilang away bisag klaro nga daog sa puntos.
Kining tikas naa sa tanang duwa bisan sa sabong. Sa ring kon di hugaw moduwa ang boksidor ang mga huwes usahay tikasan kay tingali nakapusta sa gipaburan.
Hinuon napaniid ning lindog nga dunay daghang mga away sa ring nga kontrobersiyal kaayo ang hukom sa mga huwes. Kini di kalikayan kay tawo ra sila ug busa masayop.
Ang kadaugan ni Manny kadaugan natong mga Filipino bisan asa nagpuyo sa kalibutan.
Kon kadungganan kini ni Manny labaw nga kasungganan sa atong nasod.
Nakita ning lindog nga nakabalik na si Manny sa dalan nga mohatod kaniya sa dugang pang kabantog, Sa uwahi niyang away kang Rios didto sa Macau klaro nga mao gihapon si Manny sa kaabtik ug kusog mosuntok.
Gani didto sa ring paghuman sa away, si Bradley miangkon sa interbiyo nga “ Manny is a better fighter than me. “ Dihadiha ning iyang gipamulong nabugnaw ang kaigang sa iyang pagka hambugiro. Kini ang tinuod nga sportsman!
Si Manny 35 na ang panuigon, apan mora gihapog turo ang iyang kalig-on ug kabangis sa ring. Ingon gyud niini pa si Pacman kay ang lanat sa pagka batan-on gikan sa pangedarong 15 ngadto sa 40.
Aduna pay lima ka mga tuig gikan karon nga kalisangan pa siya sa ring. Makaingon ko nga taghap ra to nga gipakatug ni Marquez si Manny. Ning maong panahon mobaha pa ang binilyon nga kuwarta alang niya.
Nindot nga sangkaon ni Manny sa sunod mao ang boksidor nga wa pa gyuy pildi sama kang Bradley kay mahimo niya ning trademark nga tigpakgang sa dagan sa ilang suwerte.
Kon kini mahitabo mosamot kaputi ang itlog ni Floyd Mayweather nga di mosukol kang Pacman. Apan kon paimnon nig food supplement sa kaisog siyarog di mosukol?
