Lariosa: Mihilak si PNoy

DIHA ang buhing gugma. Diha ang kahinugon sa kaugmaon sa nasud sa iyang paghilak. Apan wa malumping ang iyang paglaum sa iyang pag-ingon, "Filipinos are worth fighting for."

Sa naandan gitaho ni PNoy sa katawhan ang iyang mga nahimo sa miaging tuig sa iyang ikaupat nga State of the Nation's Address (Sona) atubangan sa tinibuok nga sesyon sa Kongreso sa miaging Lunes sa hapon.

Apan daghan ang wa na motuo sa iyang gipanulti tungod sa ilang kalisud sa wa pagtagamtam sa giingong pag-usbaw sa atong ekonomiya. Panahon pa kini ni Cory Aquino ang klase nga reaksiyon.

Ang nakaparat ning atong kahimtang mao kita ug ang mga kritiko. Anha dayon ihan-ok nato sa Pamuno ang kamahal sa mga palaliton ug ang kagutom nga moabot sa atong pamilya.

Di ba naa sa "Diyos ang awa at sa tao ang gawa." Wa kapugong si PNoy sa iyang Sona kay gisulti ni niya kining maong panultion nga tukma kaayo sa angay'ng pagabuhaton sa katawhan.

Dunay mga kritiko nga sinuholan sa kaatbang sa politika nga pangguba ra gyud. Dunay mga kritiko nga igo ra gyud sa pagsaway nga way ikahatag nga alternatibo o ipuli nga mga paagi nga angay'ng buhaton.

Duna say mga maayo kay alang sa kalamboan ang ilang pagsaway. Tininuod ug makatabang kaayo kay mga "constructive criticisms." Kini ang atong gikinahanglan.

Mihilak si PNoy di sa mga batikos kon di sa atong way pagpakabana sa pagtabang bisa'g gamay sa kalamboan sa atong katilingban. Nag-iyahay na lang kita sa atong isig-kaugalingon.

Tin-aw baya ang gipamulong ni U.S. President John F. Kennedy sa iyang inaugural speech, "Ask not what the government can do for you but ask what you can do to our government."

Kitang mga tawo ang gibantayan mao ra gyud ang sayop sa Pamuno. Wa nato tan-awa ang daghan niyang gibuhat alang sa atong kaayohan.

Kining iya lang kamatinud-anon nga di mangurakot talagsaon kaayo.

Kadaghanan sa atong mga lider mga kurakot. Kusog kaayong manulis sa kaban sa nasud.

Tan-awa ang pork barrel scam diin apil ang gatusan ka mga magbabalaod suma sa listahan ni Napoles.

Daghan kaayo nga mga barangay kapitan, mayor ug gobernador nga gipangkasuhan sa pangumisyon, pangikbak ug ubang pangurakot. Ang uban nabalhog na gani sa bilanggoan.

Kining iyang pagpanggukod angayan gyud unta nga abibahan ug kon mahimo atong pakpakan.

Gibuhat ni niya alang sa kaayohan sa nasud. Hapit na matapos ang iyang termino.

Gipasabot ni niya sa SONA, "Finished or not finished pass your paper."

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph