Lariosa: Suwab sa paghandom

SA miaging Dominggo sa hapon sa sam-ang sa among lungsod nanamilit ko sa hilom sa akong maguwang babaye nga gitunod sa iyang lubnganan. Init kaayo ang Adlaw, apan bugnaw sa kasub-anan ang akong dughan.

Sa maong kahimtang, uban sa kaliwatan, nakaharong ta ko sa kainit ug kaigang nga gimugna sa panahon, apan kalit may nipayong kanako. Ang ako diayng kamanghurang anak babaye nga nahingawa kanako.

Nakasabot ko nga ang kahingawa kanunayng tinukmod sa pagmahal. Diha-diha may suwab sa

paghandom nga hinayng nihiwa sa akong kaisipan ang kanunayng kahingawa sa akong maguwang kanako kaniadto.

Amo siyang kamaguwangan sa walo ka mga magsuon. Apan unom lang ang nakalahutay sa dagmal sa kalibutan. Upat ang lalake ug duha lang ang babaye. Napulo ka mga tuig ang iyang pagkamaguwang kanako.

Sa maong gintang sa panuigon usahay ang iyang kahingawa morag inahanon kaayo.

Nahingawa siya sa akong pagtuon. Dihang nisugot ang akong maguwang lalake nga maoy moabaga sa gasto. Siya mismo ang nipalista nako sa usa ka tunghaan sa high school sa siyudad.

Tuig 1958 nga unang nakatunob ko sa dakbayan isip tinun-an sa ikatulong ang –ang sa high school. Sa among panagkita kanunay siyang mopahinumdom nako sa pagtarong.

Sa ulitawo nga nukanok na ako dihay higayon nga grabe ang akong pagka igo sa alak. Sa akong pagmata diha siya sa akong kiliran nga nahingawa kaayo sa akong kahimtang.

Nakaduaw siya niadto sa akong gisak-an.

Paglabay sa katuigan dihang nakatapos na ko sa kolehiyo pilian siya sa mga babaye nga akong ikahigala. Nakasabot ko sa iyang kahingawa. Di siya buot nga mahitumpawak ko sa mga babaye nga di buotan.

Bisan kon may trabaho na ko kon magkatagbo mi sa dalan sa dakbayan kanunayng mosusi kon nganong nagsuroy-suroy ko nga gabii naman di kasaligan kuno ang mga tawo panahon sa kagabhion.

Dihang minyo na ko ug magpaulian sa among lungsod kanunay siyang mopahinumdom kanako sa pagpangadye inigsakay sa sakyanan aron panalipdan ug mapahilayo sa mga disgrasya.

Usa siya ka dalaga nga wa magaid sa hikot sa kaminyuon. Busa nakatutok siya sa tibuok banay. Usahay makahiubos ang iyang pagpanghilabot apan ako daling makasabot sa iyang kinaiya.

Di kalikayan ang away sulod sa pamilya apan alang nako usa lamang ka pagsukod sa kalig-on sa pagtahod sa matag usa, ug sa katigson sa relasyon nga gibugway sa sa pagminahalay isip managsuon.

Tua na siya, nibiya mi sa iyang lubong dihang naghinagdong ang Adlaw, apan wa kami mahingawa sa iyang pagpanaw kay siya si Leny Lariosa padulong gayud didto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph