LBC gitulis napud; pulis way nadakpan

LAIN na usab nga sanga sa LBC ang gitulis dinhi sa dakbayan sa Sugbo.

Ikatulo na kini nga sanga sa mao nga establisemento dinhi sa dakbayan sa Sugbo nga gitulis ning nakalabay nga tulo ka mga semana, apan ikapito sa kinatibuk-ang Sugbo.

Sa tulis kagahapon sa alas 12: 25, nasagmuyo ang kapulisan kay wa magamit ang close circuit television (CCTV) came­ra kay gikitkit sa ilaga ang wire.

Ang gitulis mao ang sanga sa LBC sad an F. Llamas, Brgy. Punta Princesa, diin P5,000 ang nadala sa tulo ka mga tulisan.

Sulod lang sa dos minutos nilanat ang pagpanulis ug wa makabantay ang mga silingang establisemento kon wa moabot sa dapit ang mga pulis.

Si Insp. Perceval Miasco, officer-in-charge (OIC) sa Punta Princesa Police Station nga nahinabi sa dySS Super Radyo ug Sun.Star Superbalita, nagkanayon nga ang usa ka tulisan maoy nisulod ug nangutana gilayon sa cashier nga si Jairouenwin Ayag, 27, kon pila ang bayad pagpadalag kwarta sa Cayagan de Oro City.

Apan wa pa gani siya makatiwas sa pagtubag, kalit siyang gitiunan og kalibre .45 nga pistola ug nideklar gilayon og tulis hinungdan nga nahatag niya ang kwarta tungod sa kahadlok.

Ang computer specialist nga si Nubbin Palomo, 34, way nahimo tungod kay nagpasulabi ang kahadlok samtang nakugang ang laing kaubang babaye nga naniudto kay sa pagbalik niya nabiktima na sila sa tulis.

Si Miasco niingon nga duna silay police nga regular nga beat patrol sa lugar ingon man field training police, apan gitayming sa mga tulisan nga nakalakaw kay naniudto.

Si Sr. Supt. Noli Romana, director sa Cebu City Police Office (CCPO), nagkanayon sa mga tigbalita nga sama gihapon sa unang pagpanulis sa mga sanga sa LBC, wa mag-andar ang ilang CCTV camera.

Si Romana niingon nga ang tulo ka mga tulisan sakay sa motorsiklo, ang usa nagsilbing gwardiya sa gawas samtang ang usa maoy nisulod dala ang kalibre .45 nga pistola ug maoy mitulis.

Siya nasagmuyo tungod kay gawas nga way gwardiya, wa mag-andar ang CCTV camera gumikan kay gikitkit sa ilaga dihang gisusi nila uban ni Palomo.

Gipadayag niya nga natingala sila kay sa miaging tuig lang nalantaw sa IT ang maong wire dihang gitulis sila niadtong Nobiyembre 3, 2013.

Wa niya isalikway ang posiblidad nga inside job kay akto nga dunay mga tulis, wa mag-andar ang CCTV o kaha guba.

Karong adlawa, si Romana makigtagbo sa mga manager sa LBC dinhi sa dakbayan sa Sugbo aron mapangitaan nilag sulosyon kining maong problima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph