GIDAYEG ni James Zimmerman, usa sa mga organizers sa 77th Araw ng Dabaw ang mga kandidata sa Mutya ng Dabaw karong tuiga kung itandi sa nangaging tuig.
Mas maayo ang nahimong partisipasyon karon sa mga misalmot sa panag-indig karong tuiga kay miagi sila ug makuting screening sa mga hurado, sama sa ilang public presentation sa NCCC mall, ug sa pagpakita sa ilang mga talento sa Abreeza Mall, diin gipilian sila gikan sa 30 ka mga kandidata nga nahimo na lamang nga 1.
Gawas pa, padayon silang nag-atiman sa ilang mga buluhaton sa ilang tagsa-tagsa ka komunidad sama sa outreach program, ila kining ipadayon kung palaran silang makoronahan isip sunod nga Mutya ng Dabaw 2014.
Sa pagkakaron, si Zimmerman dugang nag-ingon nga padayon pa gihapon ang ilang gihimong pag-obserba sa mga kandidata, ug matag aktibidad nga dunay puntos nga ihatag sa mga kandidata.
Masayran kini dungan sa coronation night karong Marso 14, 2014.
"Talagsaon ug puno sa kaalam ang mga kandidata sa Mutya ng Dabaw karong tuiga kay nindot ang ilang tubag sa mga pangutana ug ila gyung giseryuso ang matag community outreach program nga ilang napili," suma ni Zimmerman.
Lahi sab ang ilang madawat nga puntos sa himuong coronation night diin may mga hurado gikan sa kaulohang Manila.
Mas kulbahinam ang pagpili sa mutya karong tuiga kay di pa nila masayran kung pila ang ilang mga natalang puntos sukad sa pagsugod sa mga pasundayag nga ilang gisalmotan.
Mga finalist karong tuiga mao sila Mary Joy Villanueva, Jowielle Dawn Dogma, Jeanyvi Cahambing, Franchesca Enriquez, Angelie Villa, Mikaela Datuin, Marie Ernestine Torro, Christian Patria Acosta, Paola Patricia Hernandez, Jessa Trillanes, Kristine Joy Agcopra, Maria Izablle Lainez, Christian Gioann Yurag, Lovely Liana Clapis ug Precious Gladys Condez. (AD/CIO)