NAMATAY ang usa ka senior citizen nga mi check-in sa motel sa barangay Basak, dakbayan sa Lapu-Lapu uban sa 19 anyos nga babaye human naparok ang iyang ulo sa sementado nga sawog.
Ang lolo igo rang nitunol og sabon ngadto sa babaye nga gituohang naghubo sulod sa banyo kay naligo paglabay sa 30 minutos sa ilang pag check in.
Niadtong Martes sa alas 3 sa hapon, ni-check in ang 63 anyos nga si Greg (tinuod nga ngalan gipugngan) uban sa 19 anyos nga si Rosanna (di tinuod nga ngalan) sa Blue Sky Mansion Hotel, nga nahimutang sa Sityo Ibabao, Basak.
Saysay pa sa batan-ong babaye nga taga-Sityo Soong, barangay Mactan ngadto sa kapulisan nga human sa tunga sa oras gikan sa ilang pag-check in, naligo siya aron makalis na sa iyang sapot.
Iyang nalimtan sa pagdala sa banyo ang sabon pangkaligo hinungdan nga namalihug si Rosanna kang Greg sa pagtunol sa sabon.
Apan nakugang siya kay dihang nagkaatubang na silang duha sulod sa banyo ug gitunol sa biktima ngadto kaniya ang sabon, kalit nga nangurog ang tiguwang.
Si Greg nahagba ug giingong naparok ang ulo sa sementado nga sawog sulod sa lawak nga ilang giabangan.
Dali nga nangayo og tabang si Rosanna mga staff sa hotel apan tungod kay wa mabaliki sa panimuot si Greg, nanawag ang management og Emergency Rescue Unit Foundation (Eruf) ug gidali sa pagdala sa Lapu-Lapu City Hospital, apan gideklarar nga patay na.
Usa ka tinubdan nagtuo nga wa kaayo ma-excite ang tiguwang sa nahitabo nila ni Rosanna ibabaw sa kama kon namawong sa suga ug naghabol silang duha.
Apan dihang nakita niya ang tibuok lawas ni Rosanna nga hubo samtang naligo sulod sa banyo, didto na miulbo ang iyang excitement nga maoy hinungdan sa pagpagpangurog ug pagkatumba.
Way nakitang bun-og o samad diha sa lawas sa namatay gawas niadtong hubag sa agtang niini nga resulta sa pagkapantok.
Gitambagan sa Homicide Section sa Lapu-Lapu City Police Office ang kabanay ni Greg nga ipaubos sa autopsy aron masuta ang tinuoray nga hinungdan sa kamatayon sa biktima.