Lonzon: Paghandom sa kamatayon ni Kristo

BALAANG Semana o Holy Week ang pag-ila niining semanaha sa simbahang Kalotiko Apostolika Romano. Maoy paghinumdum sa kasakit ug pagkamatay dayon pagkabanhaw sa mananubos nga si Ginuong Hesu Kristo.

Mao nga hataas ang atong pagpahuway gikan sa makutas nga pagtrabaho tungod sa kataas sa bakasyon. Sugod ugma Huwebes, wanay trabaho hangtud na sa Lunes. Kaysa adlawng Lunes natumong man sa pagsaulog sa “Araw ng Kagitingan”.

Tungod sa maong kalihukan gidasig ang tanan sa pagpamalandong. Kun mahimo lang likayan ang mga sakit nga estorya sa iyang isig ka tawo, pagpasaylo ug ipatigbabaw ang gugma ug pagminahalay alang sa kalinaw.

Apan para nako, kining maayong kinaiya atong himoon sa matag adlaw di lang sa usa ka kasaolugan. Kay kun kini himuon sa matag usa kanato way mahitabong kasamok, pagpanglupig ug anaa ang kalinaw kay maghari man ang gugma ug naa sa ilang hunahuna ug kasingkasing ang kahadlok sa Diyos.

AWAY SA RELIHIYON

Kon mao ni mahitabo maangkon ang kalinaw sa nasud. Kay wana may kawatan, adik, kurakut nga mga opisyal sa gobiyerno ug sa simbahan. Tingale ang mahitabo mao nalang ang debate sa matag relehiyon kun kun si kinsay tinuod kanila.

Apan naa koy kaila way relihiyon ug di sab gani motuo og Ginuo apan motuo nga dunay langit. Mao nga naglibog sab ang akong ulo aning tawhana. Giboang na tingale sa Ginuo ang iyang kaugalingon tungod sa iyang pagkadato karon.

Mas arang-arang ni og pangutok ang usa sa akong nailhan. Kay motuo man siya ug Ginuo

apan dili sa mga relihiyon kay para kaniya usa kuno kini ka negosyo. Pwerte na kunong datoa sa mga dagko samtang wa gani makahunahuna sa pagtagad sa mga pobre nilang sakop.

Samtang ang akong amigo magpakamatay sab sa paglaban sa iyang relihiyon. Tiaw moy, para nila sila lang ang anak sa Diyos ug ang dili kapareho nila ug relihiyon ilang gikonsidera ug giila nga mga anak sa yawa!

Mitubag sab ang akong laing kaila ug nangutana (Brod Kris sa Christian Church). Kun tinuod nga sila maoy tinuod nga mga anak sa Diyos, ngano man nga gawas nga dunay silay kandidato nga labanan panahon sa election ang ilang mga dagko sa simbahan nagbonding sa mga opisyal sa gobierno, negosyante ug pulitiko.

Mao nga naglibog siya kay kun tinuod silang anak sa Dios nganong mobutar man sila sa mga kandidato nga anak man kaha sa yawa? Ug puwede ba diay nga ang anak sa Diyos ug ang anak sa yawa magkauban? Di ba ni pangilad?

Para sab nako ang matag relihiyon managlahi og doktrina. Ang nakasabot ug mituo miuban kanila. Ug ako sab nga kurihian ang sulti sa uban nga ang relihiyon usa ka negosyo. Kini usa ka dakong sayop kay wa man ibaligya ang relihiyon — sila man maoy nag-agni ug si kinsay mamahimo nilang sakop.

Apan ang usa sa mga problema nga ilang nabantayan -wa matagad sa mga nagdumala ug relihiyon ang kalisud sa kahimtang sa ilang mga sakop. Sa kalisud sa ilang pagpuyo lisudlisuron pa alang sa mga amotan kun dunay kalihukan ang simbahan.

Kun buot kuwentahon bilyones ka pesos na ang napundo sa uban nga mga simbahan nga sud sa pila na ka dekada human sila mibarog ug natukod ug dina mahurot ang ilang kuwarta bisan unsaon pa paggasto. efren_lonzon@yahoo.com; 09327380888/ 09156838444

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph