Lonzon: Pagkasunog sa mv Island Express 1

NAKAPANGUTANA ta niini human daghan ang mipadayag sa ilang kabalaka sa nagsunodsunod na nga aksidente sa kadagatan. Tiaw mo bay sud lang niining buwan sa Agusto duha na ka mga barko ang nalunod ug ning uwahi tulo gyud ka kininabuhi ang nakalas.

Ila sab nga gipangutana kun unsa ka luwas karon ang mga barkong pampasahiroan? Kay naa man gihapoy mga barko nga makabiyahi bisan ug maisip nato nga running coffin na ang sitwasyon. Pintal lang ang nakanidnot apan masakiton na diay ang maong barko.

Mao unta niini angayan tan-awon pag-ayo sa taga Marina. Apan ang nakapait man gud ani nila nganong di kaayo istrikto tungod kay ila naman nga kaila ang tag-iya sa barko ug mga opisyal niini. Kana bitawng gitawag nila ug kaikog!

Apan kun ang mga maldito pa maoy pasultion,ang lingin nga katarungan ug kuwadradong hinungdan maoy sinugdanan aning tanan. Wa ko moingon ha nga dunay pagpangwarta ang taga Marina sa panahon sa pag-inspection sa mga barko.

Tan-awa og kun unsay nahitabo sa mv Express 1, nalunod bisan ug maayo ang kahimtang sa panahon tungod kay faulty electrical wiring ang hinungdan dihang nassunog. Paet, kay nganong wamanki ni makita sa taga Marina nga maoy nag-inspection ug sa mga engineer sa barko?

DISGRASYA SA DUMPTRUCK

Maghatag unta kini ug leksyon ang nahitabong aksidente sa lungsod sa Barili dihang nadisgrasya ang dump truck sa munisipyo nga niresulta sa kamatayon sa 10 sa 67 ka mga sakay dihang naghatud sa lubong.

Ang gidaghanon sa mga tawo sa pagpasakay sa drayber di gyud maayo ug usa ka dakong sayop. Samotan pa nga nawad-an ug break ang dump truck, sa ato pa napakyas ang drayber sa pagsuta sa kondisyon sa sakyanan.

Maayong mahibawo ang drayber sa iyang responsibilidad sa sakyanan nga iyang gimaneho.

Isip usa ka drayber, sa dili pa mosakay ug mogunit sa manobela mao nay naandan ang pagtan-aw kun duna pa bay tubig ang radiator, igo pa ang brake fluid, asyete sa makina, kondisyon sa ligid ug gasolina.

Focus sa pagdrayb, ayaw pag-inom ug ilimnong makahubog, paggamit ug drugas ug likayan ang pagtan-aw sa mga babaye nga nagsul-ob ug makatintal nga pakigol nga shorts ug blouse nga halos molugwa na ang dughan ug ang pagsunod sa speed limit aron malikayan ang disgrasya.

KARSADA MURAG SAPA

Gikinahanglan nga dalion na sa mga opisyal sa gobyerno ang pagsulbad sa problema sa pagbaha sa kadalanan sa panahon nga mobundak ang kusog nga uwan. Kay ang tubig para sa kanal ug ang karsada dili man intawon usa ka sapa.

Kun di sila makasulbad niini mamalit nalang tag sakayan nga maoy alternatibo natong kasakyan sa higayon nga magbaha. Kay di man sab mahimo nga atong irisgo ang sakyanan sa kalawon sa tubig.

Palihug lang lihok na intawon mo mintras dipa tagaliog ang tubig. Naa may daghang kuwarta ang gobyerno ba aron palamboon ang drainage system sa tagsatagsa nato ka dapit.

GANTING SALAPI

Taliwa sa kalisud, daghan ang mainteres niining ganting salapi nga gitanyag sa Cebu Provincial Police Office ( CPPO) ug provincial government sa Sugbo, aron mas paspas ang pagkasikop ni Bella Ruby Santos, suspek sa kamatayon ni Ella Joy Peque.

Ang pangutana: kun ania paba dinhi sa Sugbo ang suspek? (efren_lonzon@yahoo.com o text sa 09156938444 ug 09327380888)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph