PARA nako, baga og nawong ni si Konsehal Jun Pe. Pasayloa lang ko kon kini ang termino nga akong gigamit. Di man sab mahimo nga magpakahilom lang ta sa mga isyu nga iyang nalambigitan.
Tiaw moy modagan na sad sa pagka konsehal sa south district sa siyudad sa Sugbo bisan og matapos na ang iyang katapusang termino sa north. Kini nagpasabot nga lami gyud diay ang maghupot og katungdanan.
Mao ni ang tighimo og balaod nga molapas sa balaod sa term limit? Ug wa sab gyud makabadlong ang mga abogadong konsehal nga kauban ni Pe sa Bando Osmeña Pondok Kauswagan. Hinuon, di na ko mahibong kay silang tanan igo lang moingon og ‘amen’ kon motingog na ang ilang amo nga si Kongresista Tomas Osmeña.
Samtang, wa man say nahimo ang kadagkoan sa Liberal Party sa pagbadlong ni Pe, nga ubos man unta sa ilang pagkontrol ang BOPK. Nagtuo man gud ta nga sila maoy maayong ehemplo kun atong tamdan ang ilang libro sa ‘Daan na matuwid’.
Naa say laing batabata ni Tomas nga si Konsehal Yayoy Alcoseba, magpapili na sa pagka board member sa unang distrito sa probinsya sa Sugbo, nagpabilin gihapong nagpasinaw sa lingkuranan sa konseho. Grabi na man kining ilang pangabuso.
GOONS SA 4TH DISTRICT
Morag dili ang tanang lungsod sa ikaupat nga distrito nga girepresentahan ni Kongresista Benhur Salimbangon nga nagbaton og goons o armadong tawo ang mga pulitiko.
Ang nabaniog nga balita base sa kasayuran nga akong nadawat, ang mga sakop sa kanhi City of Bogo Anti Crime Task Force ( CBACTAF) nga nakabasi sa syudad sa Bogo, maoy giakusahan nga goons ni Mayor Junie Martinez. Gani, gikompirmar kini ni Salimbangon, ang higpit nga karibal sa pulitika sa pamilyang Martinez. Duna nay mga alegasyon sa mga pagpang-harass nga naglambigit sa pipila ka mga sakop sa kanhi Cebactaf.
Apan, gipanghimakak ni Martinez ang alegasyon nga nagbaton siya og goons.
Dunay nagsulti nako nga gitawag og manluluwas si Salimbangon.Ang buot nilang ipasabot kay natagamtaman sa katawhan sa maong distrito ang mga proyekto nga wa mahatag sa panahon sa pamilyang Martinez sa dihang sila pa ang kongresista.
Ang akong punto dinhi, mahatagan og proteksyon ang katawhan batok sa mga pagpangharas ilabi inig adlaw sa piniliay. Ang nakanindot pabor ang duha ka habig nga mga pulitiko sa pagpaubos sa Comelec control. Apan si Martinez gusto nga ang tibuok 4th district ang ipailawom.
BARKO SA TRANS ASIA LUWAS
Nakasugat man tuod og mga gagmay nga kakulian sa kadagatan ang tulo ka mga barko sa TransAsia Shipping Lines sud lang sa duha ka semana tungod sa electrical ug mechanical problem, ang maayong balita kay gipasalig ni Abner Llinos, general manager, nga luwas sakyan ang ilang mga barko.
Gani nahitabo man sab kini sa mga barko sa ubang shipping companies. Apan ang pangutana, nganong di man makagawas ang balita kon dunay maabiriya sa ilang mga barko diha kadagatan?
Para nako dili kini angayang itago ug ikauwaw kay madaot man gani ang mga bag-ong sakyanan.Ma barko, eroplano, awto, train ug uban pa. Mao nay ilang giingon nga ang ‘kakulian dili kalikayan’.
(efren_lonzon@yahoo.com; 09327380888/ 09156938444)
(Ilad sa PRISYU SA GASOLENA)