GIPAHIBAWO sa Philippine Atmospheric Geo-physical Astronomical Service Administration (Pag-asa) nga ugma, Huwebes Santo, makasinati na og maayong panahon hangtod na sa Dominggo sa Pagkabanhaw ang Sugbo.
Nasayran nga ang nasud, ilabi na ang Kabisay-an, pipila na ka adlaw nga di maayo og panahon tungod sa low Pressure area.
Ang Pagasa nipahibawo nga karong adlawa molabang na ang LPA sa Kabisay-an ug Mindanao.
Gumikan niini, si Netherlen Saletrero, Pagasa weather specialist 1 nga nahinabi sa Sun.Star Superbalita, niingon nga sugod ugma hangtod na sa Dominggo, ang tibuok Central Visayas ug Estern Visayas makasinati na og maayong panahon ug makita na ang adlaw.
Samtang ang Palawan ug pipila ka bahin sa Western Visayas mao na usab ang di maayong og panahon.
Hinuon, bisan pa niini, ang Pagasa nipahibawo nga di angay mokompyansa tungod kay di gihapon matag-an ang panahon hinungdan nga angay nga magdala kanunay gihapon og mga panagang sa uwan ug init.