Mga duwa karon
5:45 pm- Globalport batok Air 21
8:00 pm- Ginebra batok San Miguel
MADAYON na gyud karong gabii ang gikaintapang engkuwentro sa Sugbuanong mga higante sa Philippine Basketball Association (PBA).
Si 6’10” Junemar Fajardo maoy mangulo sa San Miguel Beermen sa pagpakigbatok niini sa Brgy. Ginebra Gin Kings nga pangulohan ni 7-footer Greg Slaughter sa main game sa PBA Governor’s Cup.
Ipahigayon kini human sa panagsangka sa GlobalPort Batang Pier batok sa Air 21 Express sa premirong duwa.
Sulod na sab sa pipila ka mga higayon nga wala nadayon ang ilang panagharong kay matayming nga adunay angol si Fajardo.
Nagkaabot na man tuod ang duha apan sa usa ka exhibition game tali sa PBA All-Star batok Gilas Pilipinas.
Ang panagribal sa duha ka mga higante nagsugod dinhi sa Sugbo sa Cebu Schools Athletic Foundation Inc. (CESAFI) diin sakop si Slaughter sa University of the Visayas (UV) Green Lancers samtang si Fajardo sa University of Cebu (UC) Webmasters.
Ang Gin Kings adunay 4-2 nga rekord samtang ang Beermen naggunit og 4-3 nga baraha.
Sa laing bahin, ningsubay pa og overtime ang San Mig Coffee Mixers una nila nalupig ang Air 21 Express, 113-109.
Ang Coffee Mixers ningsangka sa 5-2 nga rekord samtang ang Express natagak sa 4-3 nga baraha.
Ang Coffee Mixers ningsalig og maayo sa ilang import nga si Marqus Blakely, kinsa nagpakatap og 36 puntos ug 17 rebounds aron pangulohan ang kadaugan.
Puntos matag usa.
SanMig (113) - Blakely 36, Simon 17, Pingris 14, Maliksi 11, Melton 9, Yap 9, Barroca
6, Devance 4, Reavis 4, Mallari 3
Air21 (109) - Sutton 22, Taulava 21, Yeo 20, Poligrates 17, Ramos 8, Villanueva 6, Camson 6, Borboran 5, Menor 2, Cardona 2.