MANAGSUONG hamtong nga mga babaye nga giingong mga bigtime pusher nadakpan sa buy bust operation uban sa ilang mga bata-bata.
Nakuhaan sila og binulto nga shabu nga gibana-banang mobalor og dul-an sa P300,000 niadtong Martes sa alas alas 6:30 sa gabii sa may F. Ralota st., Barangay Poblacion, dakbayan sa Danao.
Wa kalihok sila si Frorita “Puri” Batucan, 58, minyo, ug iyang igsuon nga si Mardonia Batucan Alvaro, 55, minyo, taga Poblacion, ug mga bata-bata nga sila si Joselito Avila, 34, ug Jasper Alvaro, 29, pulos taga Barangay Looc.
Si Sr. Insp. Leo Logroño, deputy chief sa Provincial Intelligence Branch (PIB) sa Cebu Provincial Police Office (CPPO) ug sa Provincial Anti-Illegal Drugs Special Operation Task Group (PAIDSOTG), maoy nangulo sa buy bust operation, nagkanayon nga usa ka buwan nilang gi-monitor si Batucan.
Dihang ilang nahibaw-an nga dunay ihagbong nga mga binultong drugas, ilang gipahigayon ang buy bust operation pinaagi sa pagpalit og P25,000 nga kantidad sa shabu ginamit ang boodle money nga gipaibabwan og P500.
Ang shabu gidunol ni Joselito, kinsa maoy nihatag sa ilang kaubang pulis nga nagpakaaron ingnong poseur buyer.
Dihang nadunol ang drugas, gihatag sab niini ang kwarta kang Batucan.
Gihamag gilayon nila hinungdan nga wa na makalihok si Frorita nga uban sa iyang igsuon diha sa sala nga nagbahig sa binultong shabu.
Nakuha nila sa possession ni Batucan ang lima ka dagkong putos sa shabu dala sa usa nga subject sa buy bust samtang si Mardonia nakuhaag upat ka dagkong putos sa shabu nga mobalor tanan og P225 mil pesos.
Sila si Alvaro ug Avila nakuhaan og unom ka medium size nga putos nga tag P4,500 ang usa.
Lakip sa nakuha sa ilang possession sa kusina ang daghang mga empty plastic nga sudlanan sa shabu, timbangan, ug ubang drug parapernalia.
Si Logroño nipadayag nga naa sa ilang listahan ang managsuon nga level 3 pusher nga makabaligyag 50 gramos matag semana pataas.
Si Batucan napriso sa ilegal drugas niadtong niadtong 2011 dihang nadakpan sa kapulisan sa dakbayan sa Danao.
Apan human nakapiyansa, nibalik sa pagpamaligya.
Lakip nga on bail si Joselito, kinsa nadakpan niadtong 2012.
Gipadayag ni Logroño nga daghang reklamo ang ilang nadawat kalabot sa ilegal nga kalihukan sa managsoun nga maoy hagbungan niadtong mga sindikato sa ilegal nga drugas.
