DAVAO DEL NORTE - Padayon ang imbestigasyon sa kapulisan sa pagpamusil nga gikamatay sa duha ka empleyado sa Department of Public Works and Highways (DPWH) didto sa Barangay Mankilam, siyudad sa Tagum alas 7:00 sa gabii niadtong Lunes.
Ang mga biktima mao sila Engr. Samuel Santiago, 46, ug asawa niining si Engineer Jovita Tabil Santiago, 48, molupyo sa Lynville Subdivision, Mankilam, Tagum City.
Sumala pa nga sa paghiabot sa mga biktima sa ilang balay sa Lynville Subdivision gipamusil sila sa mga naka-motorsiklo nga mamumuno. Dihang naklaro nila nga patay na ang mga biktima, gidala sa mga mamumuno ang mga dokumento gikan sa ilang sakyanan.
Nasayran nga mga 100 metros ang gilay-on gikan sa nahitaboan sa krimen, gibilin sa mga mamumuno ang dokumento.
Giingon nga ang mga biktima civil engineer sa DPWH -Compostela Valley Engineering District Office.
Gidudahan nga may kalambigitan sa trabaho ang hinungdan nga gipatay ang mga biktima. (Teddy Cabana)