Maguwang gisukmag sa manghod, namatay

PATAY ang maguwang human gisukmag sa manghod sa dihang nanghasi ang biktima sa ilang balay gumikan sa kahubog niadtong Sabado, pasado alas 6:00 sa gabii, sa Barangay Agus, dakbayan sa Lapu-Lapu.

Ang namatay mao si Joselito Igot, 37, ulitawo, walay trabaho ug molupyo sa maong lugar.

Ang suspek mao ang iyang manghod nga si Brian Igot, 27.

Si PO3 John Carlo Jocutan sa Homicide Section nga nahinabi sa Sun.Star Superbalita nibutyag nga base sa ilang imbestigasyon niabot ang biktima sa ilang balay nga hubog ug giingong nanghasi kini.

Samtang ang iyang inahan maoy giatubang sa biktima, ang manghod nga diha niadtong higayona, nilaban ug nisukmag og makausa sa maguwang. Natumba kini ug nawagtangan sa panimuot.

Daling gidala sa Lapu-Lapu District Hospital ang maguwang apan gideklarar sa mga doktor nga patay nang midangat sa tambalanan.

Ang manghod daling nisibat human sa hitabo.

“Among tan-aw ani tingalig napantok ang ulo ani pagkalamba mao ning namatay hubog man

gud,” asoy ni PO3 Jocutan.

Hinuon, girekomendar sa kapulisan ngadto sa tagtungod sa biktima nga ipailawom sa autopsy ang lawas sa biktima aron matino kon unsa gayoy namat­yan niini.

Samtang padayong gipangita sa kapulisan ang manghod nga suspek sa pagpatay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph