Marquez pildi ni Bradley

MALAUMON si American Timothy Bradley nga mahiluna siya sa boxing Hall of Fame sa ugma damlag human niya gipukan si Mexican Juan Manuel Marquez pinaagi sa split decision kagahapon sa Thomas and Mack Center sa Las Vegas, USA.

u201cThat was my ticket to the boxing Hall of Fame. I beat a great champion,” matod ni Bradley, kinsa nakadepensa na sab sa iyang World Boxing Organization (WBO) welterweight title.

Kini maoy ikaduhang depensa ni Bradley sa korona nga iyang naangkon pinaagi sa kontrobersyal nga split decision nga kadaugan batok sa kanhi pound-for-pound champion Filipino Manny Pacquiao sa miaging tuig.

Ang mga dumadapig ni Marquez ning-boo human gianunsyo ang kadaugan ni Bradley, kinsa midaog sa duha ka judges, 116-112, ug 115-113. Ang usa ka judge mipadaog kang Marquez.

Gikan sa brutal nga away batok kang Russian Ruslan Provodnikov niadtong Marso, si Bradley maayong nakalikay sa gikahadlukang counter-punch ni Marquez gamit ang iyang piktos nga jabs ug kaabtik.

Hapit tanang rounds mao-mao ra ang mga aksyon nga nasaksihan – sulod ug gawas ang away ni Bradley unya kanunayng maghuwat si Marquez nga atakihon – gawas lang seguro sa ulahing bahin sa ika-12 ug katapusang round diin nagbinumbohay na’g mga kumo ang duha ka mga boksidor.

u201cHe couldn’t touch me. I gave him a boxing lesson,” dugang ni Bradley.

Sa edad nga 40, si Marquez nakitaan na og kahinay diin dili na kaayo siya aktibo dili sama sa nangagi niyang mga away.

Apan alang kang Marquez, siya maoy midaog sa away ug napilde lang siya sa desisyon sa judges.

u201cI came to win. I felt I did win,” reklamo ni Marquez. “The judges took it away. You don’t have to knock out a guy to win. I’ve been robbed six times in my career. I clearly won the fight.”

Si Bradley misaka sa 31-0, 12KOs nga rekord samtang si Marquez nahagbong sa 55-7-1, 40KOs nga baraha.

Bayot napakyas

Sa top supporting bout, napakyas si Orlando Cruz sa iyang tinguha nga mahimong labing unang miangkon nga usa ka bayot nga makadaog og world title fight.

Nahisugamak siya sa 7th round TKO nga kapildihan batok kang Mexican Orlando Salido sa inilugay sa bakanteng WBO featherweight title.

Kanunayng giataki ni Salido ang tiyan ni Cruz gikan pa lang sa sinugdanan. Dihang nihinayhinay na ang lihok ni Cruz, sa nawong na sab miataki si Salido hangtod nga napatumba niya kini sa 7th round.

Ang beteranong si Salido miabante sa 40-12-2, 28 KOs nga rekord samtang si Cruz natagak sa 20-3-1, 10KOs nga baraha. (AP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph