Martin: James Ingram, ikaw na!

AC Martin

Tagming

PASTILANG nindota gihapon mokanta ni James Ingram. Wa gyud ko magmahay sa akong P3,000 gold ticket. Hehe.. maora sag nipalit. Thanks Ma’am Rosel!

Pagkahuman sa duha ka kanta ni Lea Salonga isip front-act, nigawas dayon si James ug nibanat sa sunod-sunod niyang signature hits. Wa gyud kay ilabay sa iyang repertoire.

Sa edad nga 60, lagsik pa gihapon kaayo ni sa stage ug wa gyuy paglubad ang tingog.

Opening song niya ang One Hundred Ways, gisundan sa akong paboritong There’s No Easy Way, ug She Loves Me (The Best That I Can).

Lig-on kaayo kay banda gyud ni James Ingram ang niduyog, uban sa iyang upat ka singers as back-up. Bug-ata paminawon, intro pa lang plakado na kaayo, labaw na inig kanta ni James Ingram. Mahilum lagi tanan.

Wa gyuy bakanteng lingkuranan, grabe ka-sold out as in nagbinarugay na lang ang mga naa sa likod, maorag panahon niadto sa kasikatan ni Martin Nievera nga magdasok ang mga tawo sa ballroom.

Gikanta sad ni Ingram ang komposisyon niyang PYT (Pretty Young Thing) nga gipasikat niadto ni Michael Jackson. Dayon gisundan sa usa ka Barry White hit, Baby Come To Me, Whatever We Imagine, ug I Don’t Have The Heart.

Ning puntoha, dunay babaye nga nitunol niyag puti nga panyo, nga maorag parehog nawong ni Madam Auring nga nitrapo sa iyang opaw. Pero dunay nag-ingon nga si Madam Auring gyud kuno to, kay daghang artista nga gida si Joed Serrano, kinsa maoy tag-iya sa That’s Entertainment Production nga maoy producer sa maong concert.

Ning puntoha nigawas og balik si Lea Salonga, kinsa gilarawan ni Ingram nga “very pretty,” ug gi-duet nila ang Somewhere Out There, nga usa sa gipak­pakan pag-ayo sa mga tawo.

Pag-exit ni Lea, gisundan ni Ingram si Lea og lakaw samtang nagtan-aw ni sa sampot sa singer-aktres.

Pwerteng pangatawa sa mga tawo, ug diha-diha ni-intro dayon ang Just Once, nga gikanta ni Ingram samtang nag-push ups sa katapusan niining mga linya.

Gagmay ra kaayog spiels si Ingram kay inig intro sa sunod niyang kantahon, maorag magwala man ang mga tawo.

Gikanta sad niya ang signature hit niyang How Do You Keep The Music Play­ing, kaduet ang negrang singer. Nihatag sad siyag tribute kang Stevie Wonder dihang iyang gikanta ang My Cherrie Amour, kinsa mao kunoy nahimo niyang asawa ug naghatag niyag unom ka mga anak.

DAN HILL

Nindot sad ang concert ni Dan Hill ug Rex Smith. Kuyaw gihapog tingog si Dan Hill pero di na lang ni kaabot og high notes. Pero ang passion ug ang ka-soulful buhi gihapon sa tingog sa maong Canadian pop songwriter-singer.

Si Rex Smith bigay sad sa maong concert pero mas daghan lang gyug hits si Dan Hill maong mas nakuha niya ang crowd niadtong gabhiona bisan pa man kon kapila siya napiyok ug halos hagawhaw na lang ang nigawas pag-singgit niyag “subside” sa ending sa Sometimes When We Touch.

Si Dan Hill, 57 (June 3, 1954) anyos pa lang diay, maguwang lang siyag usa ka tuig ni Rex Smith, 56. Pero si Ingram, 60 na niadtong Huwebes, pero wa pa gyuy timailhan nga nilubad.

GET WELL SOON

Mao nang ampinga gyud nato kanunay ang atong lawas, mag-exercise ug di magpasagad aron mapareho tang James Ingram. Ako diayng i-greet og “get well soon” si Tatay Virgilio “Billy” Sermon, Sr. nga naka-confine karon sa ICCU sa Chong Hua Hospital. Pagdalig ayo Tay kay daghan na kaayong paborito nimong kopya sa Superbalita ang naghinamhinam sa imong pagbalik!

ERRATUM

Ang source sa estorya nga “Big Brother Wa Nay Ayo?” niadtong Sabado dinhi sa Laysho mao ang byxbuzz.blogspot.com. Pasayloa nga nataligam-an og butang. Salamat.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph