MAAYONG adlaw kaninyong tanan, mga higala, ning adlaw nga Biyernes. Thanks God It's Friday! Hehehehe. Nganong magpasalamat man gyud kung Biyernes na? Magpasalamat seguro ang mga empleyado sa gobyerno kay walay trabaho pagka-Sabado. Pero, kadtong mga political staff, mapugos gyud og trabaho ilabina kon kugihan ang ilang boss, di ba?
Karong adlawa, mga higala, atong tapuson ang paghisgot sa proposal ni Konsehal Leo Avila III, chairperson sa committee on trasportation sa 17th City Council, nga pakuhaon og NC II ang mga drayber sa Technical Education Skills and Development Authority (Tesda).
Tinguha niini nga maseguro nga dunay igong kahibalo ang drayber nga magmaneho sa mga sakyanang pampasahero.
Gani, gisulti ni Avila nga makatabang kini nga masegurong luwas ang mga pasahero kon mapatuman ang iyang tinguha.
Mga higala, ania ang pahayag sa atong nahinabi:
Maayo ang tumong
"Maayo ang purpose sa proposal. Sa akong nakita, layo ra ta sa disgrasya kung mapatuman ni kay naa may igong kahibalo ang atong mga drivers. Naa man guy atong mga kaigsuonang drayber nga igo lang mopatong sa sakyanan, unya walay knowledge sa pag-atiman sa sakyanan. So, kung naa silay NC-II, makaseguro ta nga luwas ang atong pagsakay sa ilang sakyanan." Guillermo Udtohan Sr., self employed, Davao City
Makaseguro
"Dili ko mosupak sa proposal kay makaayo man ni sa atong mga commuters. Kung naa silay NC II certificates, makaseguro ta nga ensakto ang ilang training para sa safety sa ilang pasahero." Susan Embad, Cabantian, Davao City
"Di man gud tanan drivers naay knowledge sa pag-atiman sa sakyanan. Di man gud sila pareho sa mekaniko nga master nila ang makina. So, makatabang gyud ni nga proposal." Jay R Pinto, Matina Aplaya, Davao City
"Dakong hasol na sab ni namo nga mga drivers kay mo-eskwela man mi sa Tesda. Kada adlaw ra ba ang klase, asa man kuno mi mangita og kuwarta nga ibayad sa eskwela ug sa among pamilya kay di man mi maka-drive?" Louie Lozada, Agdao, Davao City.