WALA na gitagad ni Mayor Rody Duterte ang bayolenteng reaksiyon sa tigpamaba sa buhatan sa pangulo sa nasud ug ang pangulo sa Commission on Criminal Rights (…ay mali…) Human Rights diay.
Dili na kuno makig-argumento ang atong mayor kanila tungod kay tinuod lang wala kini silay nahibal-an sa rule of engagement sa kapulisan ug sa atong kasundalohan.
Kinahanglan pa nilang manaug sa tinuod nga nahitabo sa dili pa sila mohatag sa kaugalingong opinyon. Inay nga sakyan sa katawhan ang obserbasyon sa duha ka mga babayeng opisyal nakahigop na hinuon kini sa dili masalo nga mga pagsaway.
Kung si Atty Salvador Panelo pa ang pasultihon, kini si CHR chairman Etta Rosales dili abogado ug walay nahibal-an sa balaod ilabi na sa pamulis.
Busa dali ra kaayo siyang makatubag sa kutob sa iyang makita ug magpadayag sa iyang gibati sa walay igo nga imbestigasyon kon nganong nahitabo ang iyang nakita sa mga video.
Naay uban nag-ingon nga wala gani kasulti og mga bayolenteng reaksiyon si Etta bahin sa Manguindanao Massacre nga hangtud rong panahona wala pay hustisya nga nakutlo ang mga tagtungod sa mga biktima. Kadto tataw nga nakalapas sa tawhanong katungod.
Ang nahitabo kaniadtong Hulyo 11 nga rescue operation sa kidnapped victim nga si Sally Chua, usa sa labing malampuson nga operasyon sa atong kapulisan. Walay naangin nga mga sibilyan o nadanyos nga mga kabtangan sa palibot niini.
Usa ka shoot-to-kill order ang gimando sa alkalde ning dakbayan sa kutob sa mga mosukol. Giingon sa mga nanaway nga wala kunoy engkuwentro nga nahitabo busa dili kuno angay nga pamatyon ang mga suspetsado. Tratahon kuno kini sila nga tawo subay sa ilang katungod ug dili mosukol.
Apan sa maong hitabo walay nakabantay tungod kay kalit kaayo.
Dunay nakakuha og video gikan sa mga amateur apan dunay distansiya. Kini maoy migatilyo sa reaksiyon sa duha ka mga babayeng opisyal.
Klaro nga armado ang mga napatay ug subay sa sumbanan sa pamulis diha sa engkuwentro kinahanglan dili gayud magpa-una ang mga awtoridad.
Si mayor pa, kon mahitabo kini, gasayang-sayang lang ang gobyerno'g ginasto alang sa pagbansay-bansay, dapat kauna gyud pirmi.
Ang katawhan na lamang ang maghukom bahin sa mga isyu nga ikaw, ako, kitang tanan dunay kalabutan.
Nangandam na karon ang lokal nga kagamhanan alang sa ika-28 ka tuig nga kasumaran sa selebrasyon sa hari sa tanang pista sa siyudad sa Dabaw nga mao ang Kadayawan sa Dabaw.
Giumol na ang mga komitiba nga maoy tahasan sa mga kalihukan. Tutok lamang sa mga pamantalaan ug pahibalo sa radyo ug telebisyon aron masubay nimo ang tanang eskedyul. Basta ikagarantiya nako nga seguradong bibo na usab kaayo ang selebrasyon.