Media tabangan makada og pusil

GENERAL SANTOS CITY -- Gipasalig ni General Santos City Mayor Darlene Antonino-Custodio nga tabangan ang mga miyembro sa media sa dakbayan nga makakuha og permiso aron nga makadala og pusil aron nga dunay magamit isip proteksiyon sa ilang kaugalingon.

Ang pasalig sa mayor nahitabo sa dihang usa ka magsisibya sa radyo nga si Cris Guarin gipatay sa nakasakay og motorsiklo niadtong Huwebes sa gabii sa milabay'ng semana.

Si Guarin usa ka kanhi reporter sa Bombo Radyo kinsa nahimong station manager sa kanhi RGMA-Super Radyo sa Gensan ug nahimong bloctimer sa RMN.

Nagpatawag og tigum si Custodio kon diin gihisgutan ang pagpamatay sa media ug ang pamaagi aron nga malikayan kini.

Matud sa mayor nga mohangyo siya kang Philippine National Police Chief Nicanor Bartolome aron makahupot og armas ang mga miyembro sa media.

Dunay migawas nga reaksiyon gikan sa katawhan nga posibleng buhi pa si Guarin kon duna siyay armas niadtong tungura sa dihang gipusil sa mga suspek.

Sa pagkakaron, hugot ang gihimong imbestigasyon sa Task Force Guarin aron masulbad ang kaso ug madakpan ang mga suspek.

Gipaboran sab sa mga sakop media gikan sa Sarangani, South Cotabato, Sultan Kudarat ug mga siyudad sa Kidapawan, Tacurong, Koronadal ug Cotabato City ang plano ni Custodio nga makadala og armas kadtong mga magsisibya ug manunulat nga dunay hulga sa ilang kinabuhi. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph