Meditalk: Nagproblema sa buhok sa ilok

DEAR Dr. Fritz,

Maayong adlaw kanimo. Ako diay si Ada nga taga Bansalan. Nisuwat ako kanimo mahitungod ning buhok sa akong ilok. Nagsige naman lang ko ani og balbas. Pero, dali lang kaayo motubo. Dili man gud ko ganahan kay mora ko og lalaki kung dili nako nibalbasan. Gawas pa, kung pasagdahan nako nga motubo, kung paninguton ko, paminaw nako mas mobaho ko. Mao nga nagsige na lang ko og balbas. Unsa man ang akong buhaton, dok, nga dili ko magpunay og balbas ning akong ilok?

Daghang salamat sa imong pagtagad. More power to you and SuperBalita!

Ada of Bansalan

Dear Ada of Bansalan,

Kining buhok sa ilok dili gyud kini maayo tan-awon, ilabina kay babaye ka. Ug makapasamot usab kini sa baho sa ilok. Mao nga ensakto ang imong napaminawan nga daw mobaho ka kung dili ni nimo mabalbasan. Kung pasagdahan usab ni nimo ang buhok sa imong ilok, kung mogamit ka og deodorant, mokubos ang ka-epektibo niini kay dili makasuhot sa imong ilok.

Ania kitay mga temporaryo ug permanente nga solusyon alang buhok sa imong ilok.

Ang kasagaran ug pinakasayon nga pamaagi mao gayud ang imong ginahimo nga pamalbas sa imong ilok. Apan, angay nimo nga buhaton kini kada adlaw kung gusto nimo nga ma-mintinar ang malim-aw gayud kining imong ilok.

Ang ikaduhang pamaagi nga dili angay nimo nga buhaton kada adlaw mao ang pagpahid og chemical depilatory. Usa kini ka cream nga ipahid nimo sa imong ilok – diha sa mga buhok niini. Ang mga buhok sa cream makapahumok sa buhok ug makapahulhog niini nga dili ka na angay nga mamalbas pa. apan, ang maong pagtambal moigo lamang sa buhok nga anaa sa taas sa panit. Mao nga buhaton gihapon kini nimo kanunay. Apan, mas molungtad kini og mas dugay kaysa pagpamalbas. Mamahimo kini nimo nga buhaton kada semana o kada duha ka semana. Apan, ang problema lamang, kay ang ubang klase niini makapa-iritar sa panit. Mao nga kinahanglan gayud nga testingan usa nimo kini diha sa imong panit usa ka pa mohimo niini. Pagpahid og gamay sa maong cream diha sa dapit duol sa imong pulso. Pasagdahi kini sa tibuok gabii ug tan-awa inig ka buntag ug wala ba kini reaksyon. Kung walay problema, nan, mamahimo na nimo kini nga gamiton diha sa imong ilok.

Apan, kung gusto nimo ug mas malungtad nga resulta, nan, mamahimo ka nga mosulay og waxing. Isugyot nako ang cold waxing kaysa hot waxing – kay sakit gayud ang naulahi. Mas dugay kini nga makapabalik sa imong buhok kaysa sa duha ka mga nauna nga proseso – tungod kay ibton niini apil ang ugat sa imong buhok. Apan, gikinahanglan nga mga ¼ sa pulgada ang katas-on sa imong buhok aron kini mamahimong epektibo.

Tungod kay medyo ubay ubay pa ang atong pagahisgutan, tuguti ako nga pagasumpayan ta kini sa sunod nga edisyon ning atong patik. Hangtud sa sunod!

Dr. Fritz

r(Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph